पोखरा – जिल्ला प्रहरी कार्यालय कास्कीका प्रमुख प्रहरी उपरीक्षक घनश्याम अर्यालमाथि आफ्नै संगठनका जुनियर अफिसरमाथ कुटपिट गरेको आरोपमा राष्ट्रिय मानवअधिकार आयोगमा उजुरी परेको छ । अर्यालले कास्की प्रहरीमै कार्यरत प्रहरी सहायक निरीक्षक कमलप्रसाद श्रेष्ठमाथि हातपात गरेको परिवारको आरोप छ ।

श्रेष्ठकी पत्नी सीताले आफ्ना पतिमाथि एसपी अर्यालले हातपात गरेको आरोपसहित कारबाहीका लागि आयोगमा उजुरी दिएपछि घटना बाहिर आएको हो । उजुरीमा सीताले आफ्ना पतिमाथि अर्यालले गत ३२ साउनमा आँखै अगाडि टाउकामा तीन मुक्का प्रहार गरेको उल्लेख गरेकी छन् ।

सीताले कुटाइपछि पति कमलको दाहिना कानम सुनिएको र जाली फुटेको आशंका गरिन् । एक महिलाको विषयमा विवाद परेपछि एसपीले श्रीमानलाई कार्यकक्षमा बोलाएको र आफूसमेत गएका बेला घटना भएको उनले बताइन् ।

प्रहरी श्रोतका अनुसार एक महिलाले कमल आफ्ना श्रीमान भएको दाबीसहित छोराको नागरिकता बनाइदिन माग गर्दै उजुरी दिएकी थिइन् । मकवानपुरको हेटौंडा घर भएकी ती महिलाले आफूलाई कमलकी कान्छी श्रीमती दाबी गरेकी थिइन् ।

ती महिलाले कान्छी श्रीमतीका रुपमा कमलको आधा तलबसमेत बुझ्दै आएकी छन् । यसैबीच एसपी अर्यालले भने आफूले कमलमाथि हातपात नगरेको दाबी गरेका छन् । तर, कान्छी श्रीमती पट्टीका सन्ताललाई नागरिकता दिन भनेको उनले स्वीकार गरे ।