काठमाडौँ – मन्त्रिपरिषदको बिहीबार बसेको बैठकले मधेस आन्दोलनमा मारिएका ५२ जनाको परिवारलाई १० लाख क्षतिपूर्ति दिने निर्णय गरेको छ । आन्दोलनमा मारिएका दश सुरक्षाकर्मी सहितका परिवारलाई १० लाखका दरले क्षतिपूर्ति दिने निर्णय गरेको हो ।

मधेस आन्दोलनमा मारिएका ६८ जनाको परिवारको सूची केही दिनअघि मधेसी मोर्चाले उपलव्ध गराए पनि ५२ परिवारका लागि उक्त निर्णय भएको बताइएको छ । अघिल्लो केपी ओली नेतृत्वको सरकारले भने ४२ जनालाई राहत दिएको बताइएको थियो । बैठकले मधेस आन्दोलनका क्रममा भएका घटनाहरुको बारेमा छानबिन गर्न पूर्व न्यायाधीश गिरिशचन्द्रलालको अध्यक्षतामा आयोग समेत गठन गरेको छ ।

सो आयोगले मधेस आन्दोलनका क्रममा भएका हिंसात्मक घटना, निजी तथा सार्वजनिक सम्पत्तिमा पुगेको क्षति लगायतका सवालमा छानबिन गर्ने जनाइएको छ । लामो समयदेखि मधेसमा आन्दोलनरत मधेसी मोर्चाले आन्दोलनमा मारिएकाहरुलाई सहिद घोषणा गर्नुपर्ने माग राख्दै आएको थियो ।