चितवन – सोमबार बिहान घटनास्थल घोप्टेभिरमा एक महिलाका आँखाबाट निरन्तर आँशु वगिरहेका थिए । उनी भावविह्ल अबस्थामा थिइन । पूर्वगृहमन्त्री माधवप्रसाद घिमिरेसँगै उनी पनि मुक्तिनाथ यात्रामा थिइन । ‘असोज ८ गते बिहान जोमसोमबाट हिँडियो, म बेनीमा झरेँ, उहाँहरु बागलुङकालिका दर्शन गरी पोखरा गएर बस्नुभयो’ उनले रुदै भनिन् ।

यसरी घोप्टेभिरमा आँशुका धारा बगाउने थिइन, पूर्वगृहमन्त्री घिमिरेकी आफ्न्त दीपा आचार्य घिमिरे । दिपा पनि घिमिरे परिवारसँगै मुक्तिनाथ यात्राकी सहयात्री थिइन तर बेनीमा झरेका कारण उनी दुर्घटनामा  परिनन् । तर दुखको भेलमा उनले थाम्न सकिरहेकी छैनन् ।

दीपाका बुबाका मामाको छोरा –ठूलोबुबा) घिमिरे परिवारसँगै आचार्य पनि असोज ५ गते काठमाडौँबाट मुक्तिनाथ यात्रामा निस्केका थिए । ‘बिहान ७ बजे हामी काठमाडौँबाट हिँडेका थियौँ । गाडीमा माधवप्रसाद घिमिरे, उहाँका आफ्नै भाइ प्रकाश, काकाको छोरा मोहन, नाताले काका पर्ने नारायणप्रसाद काफ्ले र चालकसहित दुई सुरक्षाकर्मी टोलीमा रहेका थिए’ दिपाले भनिन् ।

एनले  असोज ५ गते राति बेनीमा बास बसी यात्रा तय गरेको बताइन । ‘असोज ६ गते जोमसोममा बसियो । असोज ७ गते त्यहीँबाट कागबेनीमा गएर श्राद्ध गरी साँझ फेरि जोमसोममा नै बसियो । उनले थपिन ‘असोज ८ गते बिहान जोमसोमबाट हिँडियो, म बेनीमा झरेँ, उहाँहरु बागलुङकालिका दर्शन गरी पोखरा गएर बस्नुभयो । असोज ७ गते घिमिरेले र असोज ८ गते काफ्लेले श्राद्ध गर्नुभएको थियो ।’

आचार्यका पिता यादव आचार्य म्याग्दी जिल्लाको सहायक प्रमुख जिल्ला अधिकारी हुन् ।

कर्मचारी वृत्तमा निकै परिचित र दोस्रो संविधानसभाको निर्वाचन गराउन सफल भएकै कारण धेरैको प्रिय बनेका पूर्वगृहमन्त्री माधवप्रसाद घिमिरे आफ्ना दुई भाइसहित आइतबार साँझदेखि त्रिशूली नदीमा बेपत्ता छन् ।

आइतबार साँझ अबेर उहाँ चढेको गाडी त्रिशूली नदीमा खसेर वेपत्ता भएदेखि नै कुरिनटारको घोप्टेभिरमा उनीहरुको अवस्था बुझ्न आउनेको भीड लाग्ने गरेको छ । सोमबार बिहान सबेरैदेखि घिमिरेका इष्टमित्र, आफन्त हुँदै नेपाल सरकारका उच्च पदस्थ कर्मचारी समेत घटनास्थल आइपुगेका थिए ।

चितवन र छिमेकी जिल्लाका प्रमुख जिल्ला अधिकारीसहित सुरक्षा निकायका जिल्लास्थित प्रमुख पनि घोप्टेभिर पुगेर खोजी कार्यमा सहयोग गरिरहेका छन् ।

घटनास्थलमा अर्का एक ब्यक्ति पनि आँशु थाम्न सकेका थिएनन् । घिमिरेका फूपूका छोरा भार्इ यादव आचार्य पनि मुक्तिनाथ यात्रा सँगै थिए । “साँझ ५ बजे मैले दाइलाई फोन गरेँ, धेरैबेरपछि सुरक्षाकर्मीले फोन उठाए, हामी आत्तिएर आइपुग्यौँ । अहिले पनि घटना सपना जस्तै लाग्छ,” उनले भने ।

आचार्यका अनुसार पूर्व गृहमन्त्री एवम् मुख्यसचिव घिमिरेकी श्रीमती कमला र बुहारी आकांक्षा काठमाडौँकै घरमा बस्छन् । भने छोरा सुशान्त अस्ट्रेलियाबाट फर्किदैछन् । छोरी सृष्टि पाल्पा मेडिकल कलेजमा चौथो वर्षमा अध्ययनरत छिन् ।

घटनास्थलमा गृहजिल्ला पाल्पासहित देशभर छरिएर रहेका आफन्त कुरिनटार आइपुगेका छन् भने उनकै समयदेखि सरकारी सेवामा रहेका पनि आउनेक्रम जारी छ । घटनास्थलमा झोला र मोबाइल फेला परेको छ ।

घिमिरेका आफ्न्तले यही तरिकाबाट खोजिकार्य जारी रहेपनि फेला पर्न नसक्ने र थप उद्धार कार्यका लागि उपकरण मगाउन घटना स्थल पुगेका भौतिक योजनामन्त्री रमेश लेखकसँग आग्रह गरेका थिए । दीपा भावविह्ल अबस्थामा रोएको देखेर मन्त्री लेखकले पनि आँशु झारेका थिए ।

लगतै घटनास्थलबाट मन्त्री लेखकले प्रधानमन्त्री पुष्पकमल दाहाल प्रचण्डलाई टेलिफोन गरी उपकरण ल्याउनु पर्ने बताएका थिए ।