काठमाडौँ – प्रधानमन्त्री पुष्पकमल दाहाल ‘प्रचण्ड’ ले असन्तुष्ट मधेसी मोर्चाका नेताहरुसँग आज अपराह्न छलफल गर्ने भएका छन् ।

छलफलका लागि प्रधानमन्त्रीले आफूहरुलाई दिउँसो तीन बजे सरकारी निवास बालुवाटार बोलाएको सदभावना पार्टीका महासचिव मनिषकुमार सुमनले जानकारी दिए। उनका अनुसार बैठकमा मोर्चाले प्रचण्डलाई प्रधानमन्त्रीमा भोट दिनुअघि मोर्चा र घठबन्धनसँग भएको सहमति कार्यान्वयनका लागि दबाब दिने छ । प्रदेश सिमांकनमा आफूले भने जसरी संविधान संशोधन गर्नुपर्ने अडानमा मोर्चा छ ।

तर, प्रमुख विपक्षी एमाले र सत्तारुढ काँग्रेसभित्रकै रामचन्द्र पौडेल समूह सिमांकन बदल्ने पक्षमा छैन । सुमनले प्रधानमन्त्रीलाई पूर्वसहमतिबारे स्मरण गराइने बताए ।

‘हामीले धम्की र चेतावनी दिने होइन’, उनले भने, ‘प्रधानमन्त्रीलाई सहमति पालनाका लागि ताकेता गर्ने हो ।’ उनले मोर्चाले सरकारलाई दिएको समर्थन तत्काल फिर्ता लिने मनस्थिति नबनाएको प्रष्ट्याए ।

यसअघि सोमबार बसेको मोर्चा बैठकले सरकार माग पूरा गर्ने दिशामा अग्रसर नभएको र आफूहरुलाई धोका भएको भन्दै प्रधानमन्त्रीसँग निर्णायक वार्ता गर्ने निर्णय गरेको थियो ।

त्यसको एक दिनपछि नै प्रधानमन्त्रीले मोर्चा नेतासँग छलफल गर्न लागेका हुन् । छलफलमा सत्तारुढ काँग्रेसका नेता र वरिष्ठ मन्त्रीहरुसमेत सहभागी हुने बताइएको छ ।