काठमाडौं – पाल्पाको पहिचान गराउने उद्देश्यले असोज १ गते काठमाडौंमा पाल्पा महोत्सव गरिने भएको छ । लामो समयदेखि क्रियाशील संस्था पाल्पाली संगम काठमाडौंले पाल्पाको पहिचान गराउने  उद्देश्यले काठमाडौंको भृकुटी मण्डपमा एक दिने पाल्पा महोत्सवको आयोजना गरेको हो ।

पाल्पाली पहिचान पाल्पाली करुवाबाट पानी खाएर महोत्सवको उद्घाटन गरिनेछ ।पाल्पामा आन्तरिक पर्यटनलाई प्रवर्धन गर्ने उद्देश्यले महोत्सवमा  पाल्पाली कला, संस्कृति र उत्पादनहरु रहने पाल्पाली संगमका अध्यक्ष रुद्रनाथ बस्यालले बताए ।  

महाेत्सवमा पाल्पाली खानाका परिकारहरु चुकाउनी, बटुक (बारा), सेलरोटी, हाँसको छोइला लगायतकाकाे प्रदर्शन गरिने जनाइएको छ ।त्यस्तै, पाल्पाली उत्पादनहरु ढाका र करुवाको समेत प्रर्दशन हुनेछ ।

महोत्सवमा  पाल्पाका विभिन्न ब्यक्तिहरुलाई सम्मान गर्ने कार्यक्रम समेत रहेको संगमले जनाएको छ । महोत्सव उद्घाटनमा राष्ट्र बैंकका गभर्नर डा.चिरञ्जीवी नेपाल, नेपाल सरकारका सचिव नारायणगोपाल मलेगो, राजेन्द्र नेपाल, शान्तबहादुर श्रेष्ठ, नेपाल प्रहरीका अतिरिक्त प्रहरी महानिरीक्षक रमेशशेखर बज्राचार्य लगायतलाई बधाई तथा शुभकामना दिने कार्यक्रम रहेको छ ।

जम्मा १५ वटा स्टल रहने महाेत्सव बिहान ११ः ३० देखि बेलुका ६ बजेसम्म चल्नेछ। महोत्सवको उद्घाटन पर्यटनमन्त्री जीवनबहादुर शाहीले गर्ने आयोजकले जनाएको छ ।