काठमाडौं – नेपालका प्रधानमन्त्री पुष्पकमल दाहाल प्रचण्ड चार दिने राजकीय भ्रमणमा भारत छन् । तर भारतीय मिडियाको चासो उत्तरप्रदेश राज्यका एक मन्त्रीको राजीनामा परेको छ । राजकीय भ्रमणका गएका नेपालका प्रधानमन्त्री दाहाल भारतीय मिडियाको चासो र प्राथमिकतामा परेका छैनन् ।
१२५ जनाको जम्वो टोलीसहित दिल्ली पुगेका प्रधानमन्त्री दाहालले शुक्रबार भारतीय प्रधानमन्त्री नरेन्द्र मोदीसँग संयुक्त र वान टु वान वार्ता गर्ने भएका छन् । तर भारतीय मिडियाले यो कुरालाई चासो दिएको छैन । उनीहरुको चासो उत्तरप्रदेश राज्यका मुख्य मन्त्री अखिलेश कुमार र त्यहाँका एक मन्त्रीको राजीनामामा परेको छ । भारतीय मिडियाले प्रधानमन्त्री दाहालको भारत भ्रमणलाई सानो स्थान दिएका छन् । सवै अखवार र टेलिभिजनले दाहाललाई चीन विरोधी नेताका रुपमा चित्रण गरेका छन् । भारतीय लोकप्रिय पत्रिका दैनिक भाष्करदेखि हिन्दुस्तान टाइम्ससम्मले दाहाललाई चीन विरोधी नेताका रुपमा प्रस्तुत गरेका छन् ।
पूर्वप्रधानमन्त्री केपी शर्मा ओली भारत विरोधी र चीन परस्त भएको आरोप लगाउँदै आएका भारतीय मिडियाले दाहालको भ्रमणलाई ‘ठुलो मौका’ का रुपमा अथ्र्याउन थालेका छन् । अघिल्लो प्रधानमन्त्रीले रसुवागढी–काठमाडौ र काठमाडौ–पोखरा– लुम्विनी रेल मार्गका लागि सम्झौता गरेका थिए । दाहाललाई चीन विरोधी र भारतपरस्त बनाउन बरहवा–काठमाडौ रेल मार्गको सम्झौता भारतीय प्रधानमन्त्री नरेन्द्र मोदीले गर्न लागेको भारतीय मिडियाले समाचार प्रकाशन गरेका छन् ।
प्रधानमन्त्री दाहालको भ्रमणलाई चीनको प्रभाव नेपालमा कम गर्ने अवसरका रुपमा भारतीय मिडियाले अथ्र्याउन थालेका छन् । तर यो बिषयमा भने नेपाल सरकारले आफ्नो आधिकारीक धारणा बाहिर ल्याएको छैन । भारतीय दैनिक पत्रिका जागरणले पनि दाहाललाई चीन विरोधी नेताका रुपमा चित्रण गरेको छ । दाहालको भ्रमणले भारतसँग सम्बन्ध सुध्रिने र चीनको प्रभाव नेपालमा कम हुने समाचार प्रकासित गरेको छ ।
भारतीय सरकारको अफिसियल पत्रिका मानिने टाइम्स अफ इन्डियाले नेपालको संविधान संशोधन र मधेसी मोर्चाका मागका बिषयमा दुई प्रधानमन्त्रीबीच छलफल हुने बताएको छ । भारतीय प्रधानमन्त्रीको उच्च स्रोतलाई उर्दृत गर्दै टाइम्स अफ इन्डियाले दुई प्रधानमन्त्रीको संवादपछि नेपालमा संविधान संशोधनको प्रस्ताव अघि बढ्ने दावी समेत गरेको छ ।
- एस काठमाडौँ
