गत वर्षको तुलनामा चालु आर्थिक बर्षको भदौ मसान्तसम्मको राजस्व संकलन २९ प्रतिशतले वृद्धि भएको छ । यो आवको भदौ महिनासम्मको राजस्व संकलनको लक्ष्य २८ अर्व ७५ करोड ६६ लाख ३७ हजार रहेकोमा २८ अर्व ९३ करोड ६ लाख ६५ हजार संकलन भएको हो ।
आन्तरिक राजश्व बिभागका अनुसार शीर्षकगत रूपमा आयकर तर्फ १२ अर्व २१ करोड ९७ लाख ८६ हजार, मूल्य अभिवृद्धि कर १० अर्व ४५ करोड २ लाख ३५ हजार र अन्तःशुल्क तर्फ ५ अर्व ९१ करोड ६५ लाख ८८ हजार संकलन भएको छ । सो रकम लक्ष्यको तुलनामा आयकर तर्फ १०३ प्रतिशत, मूल्यअभिवृद्धि कर तर्फ ९८ प्रतिशत र अन्तशुल्क तर्फ १०१ प्रतिशत रहेको जनाइएको छ ।
त्यसैगरी शिक्षा सेवा शुल्क र स्वास्थ्य सेवा कर क्रमशः १३ करोड ८३ लाख ७१ हजार र २० करोड ५६ लाख ८५ हजार रुपैयाँ संकलन भएको छ । शिक्षा सेवा शुल्क तर्फ लक्ष्यको तुलनामा १०२ प्रतिशत र स्वास्थ्यसेवा कर तर्फ लक्ष्यको तुलनामा ७९ प्रतिशत संकलन भएको हो । गत वर्षको तुलनामा आयकर वृद्धिदर १३६ प्रतिशत, मूल्य अभिवृद्धि कर वृद्धिदर ११४ प्रतिशत, अन्तशुल्कको वृद्धिदर १४९ प्रतिशत, स्वास्थ्य सेवा कर वृद्धिदर १२३ प्रतिशत र शिक्षा सेवा शुल्क वृद्धिदर १३७ प्रतिशत रहेको बिभागले जनाएको छ ।
