काठमाडौं – हाजिर गरेर सांसदहरु आ–आफ्ना काममा हिडेपछि आजको संसद बैठक  पनि स्थगित भएको छ । प्राय सांसदहरू अाइएनजिअाेकाे कार्यक्रम तिर लाग्ने गरेपछि संसद भवन रित्ताे हुने गरेकाे छ । 

बुधबारकाे संसद बैठकमा संविधानसम्बन्धी महत्वपुर्ण आयोग गठनसम्बन्धी विधेयकमाथिको छलफल भइरहँदा नेपाल मजदुर किसान पार्टीका सांसद डिल्लीप्रसाद काफ्लेले गणपुरक संख्या नपुगेको भन्दै संसद बैठक रोक्न माग गरे । 

लगत्तै सभामुख ओनसरी घर्तिले संसदमा उपस्थित सदस्य संख्या गणना गर्न सचिवालयलाई निर्देशन दिइन् । गणना गर्दा संसद सचिवालयका अनुसार  बैठकमा ४ सय ५४ जनाले हाजिर गरेपनि बैठकमा १ सय २५ जना सांसद मात्रै रहेको देखीयाे । त्यसपछि सभामुखलार्इ बैठक स्थगित गर्नु पर्ने बाध्यता अाइलाग्याे ।

स्रोतका अनुसार बुधबार नै वातावरण समितिले सांसदहरुलाई नगरकोटमा आवासीय कार्यक्रम आयोजना गरेको थियाे  । सांसदहरु संसद बैठक छाडेर नगरकोटमा वातावरण समितिको कार्यक्रममा गएका थिए । संविधान कार्यान्वयनसम्बन्धी महत्वपुर्ण आयोग गठन गर्ने विधेयकमाथिको छलफल छाडेर  सांसदहरु आइएनजीओको कार्यक्रममा जाँदा संसद बैठकमा उपस्थित रहेका सांसदहरुले आफुहरुको समेत अपमान भएको बताए । 

नेपाली कांग्रेसका सांसद रामहरि खतिवडाले भने– केही सांसद नगरकोट गए , बैठकमै बसेका हाम्रो पनि अपमान भयो ।   नेपालको संविधानको धारा ९४ बमोजिम कुनै पनि विषयमा निर्णय लिदा तत्काल कायम रहेको ५ सय ९६ संसद संख्याको एक चौथाई अर्थात् १ सय ४९ जना सांसद संसदमा उपस्थित हुनुपर्छ । तर त्यहाँ केहि पनि भएन ।

तर गणना गर्दा संसद बैठकमा १ सय २५ जनामात्रै सांसद बैठकमा उपस्थित थिए । यसअघि भदौ २४ गते पनि हाजीर गरेर सांसद आइएनजीओको कार्यक्रममा सहभागी हुन गएपछि संविधानअनुसार गठन हुने उच्च अदालतसम्बन्धी विधेयक अलपत्र बनेको थियो ।