">
काठमाडौं – प्रधानमन्त्री पुष्पकमल दाहाल प्रचण्डको चार दिने राजकीय भ्रमणमा प्रमुख प्रतिपक्ष दल नेकपा एमालेले सहभागिता जनाएन । प्रधानमन्त्रीको औपचारिक भ्रमणमा सत्ता र प्रतिपक्ष दलका सांसदहरु सहभागि हुने विगतको परम्परा छ । तर प्रमुख प्रतिपक्ष दल एमालेले भने प्रधानमन्त्रीको भारत भ्रमणमा औपचारिक निम्तो नआएको भन्दै सहभागिता जनाएको छैन ।
‘हामीलाई कुनै औपचारिक जानकारी आएन, शिर्ष तहमा नेताहरुसँग कुरा भएको भए बेग्लै कुरा हो’ एमाले सचेतक भानुभक्त ढकालले भने ‘हाम्रो सहभागिता नभएपनि प्रधानमन्त्रीज्यूलाई राष्ट्रका पक्षमा राम्रो काम गर्न शुभकामना छ ।’ ढकालले प्रधानमन्त्री कार्यालयबाट औपचारिक पत्र आएको भए केही सोच्न सकिने बताउँदै पत्र नै नआएपछि आफुहरु सहभागि नभएको बताए ।
प्रधानमन्त्री दाहाल जम्वो टोली लिएर विहीबार भारतको राजकीय भ्रमणमा गएका छन् । भ्रमणमा गृहमन्त्री विमलेन्द्र निधि, भौतिक योजनामन्त्री रमेश लेखक पनि सहभागि छन् । त्यसैगरी कांग्रेस र सत्ता पक्षका सांसदहरु पनि सहभागि भएका छन् । तर एमाले, राप्रपा नेपाल र फोरम लोकतान्त्रिकले भने कुनै पनि सांसदलाई प्रधानमन्त्रीको भ्रमणमा सहभागि गराएको छैन ।
उता प्रधानमन्त्री कार्यालयले भने १० भन्दा बढि सांसद भएका सवै राजनीतिक दललाई भ्रमणका लागि निम्तो पठाएको बताएको छ । ‘१० भन्दा बढि सांसद भएका ८ दललाई निम्तो पठाइएको थियो, तर केही दलहरु सहभागि हुनुभएन’ भारततर्फ लाग्नु अघि प्रधानमन्त्रीका स्वकीय सचिव रमेश मल्लले भने ।
- एस काठमाडौँ
