काठमाडौं – पूर्ववर्ति सरकारले चीनसंग गरेका सम्झौता कार्यान्वयनमा उदासिन देखिएका प्रधानमन्त्री पुष्प कमल दाहाल प्रचण्डले भारतसंग नयाँ सम्झौताको हात वढाउने संकेत देखिएको छ ।

सन २०२० सम्म उत्तरी नाकाबाट काठमाडौंमा रेल पुर्याउन सकिने चिनिया तयारीलाई वेवास्ता गर्दै प्रचण्डले भारतसंग नयाँ रेल वे लाईनको सम्झौता गर्ने संभावना वढेको हो । विहिवार देखि चार दिने भारत भ्रमणमा जान लागेका प्रधानमन्त्री दाहाललाई नेपाल –भारत सम्वन्धको नयाँ आयाम भन्दै भारतले नेपालमा पूर्व पश्चिम रेल वे लाइन विकासमा सहयोगको प्रस्ताव राख्ने तयारी गरेको छ ।

भारतले विकास गरिदिने पूर्व पश्चिम रेल वे लाईन १०३० कि मी सम्मको हुने र त्यो पूर्वपश्चिम राजमार्गको समानान्तर हुने भारतीय एक्सपर्टहरुको अनुमान छ । भारतले रेल वे लाइनका लागि गृहकार्य गरिसकेको वुझिएको छ ।

चीनले पनि काठमाडौं, पोखरा र लुम्विनीमा रेल पुर्याउन सहयोग गर्ने चासो देखाएको थियो । त्यसैको काउण्टरमा भारतले पूर्व पश्चिम रेल वे लाईन विकासमा सहयोगको प्रस्ताव राख्ने भएको हो ।

जानकारहरुले यस प्रस्तावलाई कुटनीतिक रुपमा महत्वपूर्ण कदम हुन सक्ने निक्र्यौल गरेका छन् । भारतले प्रचण्डको भ्रमणलाई नेपालमा चीनको वढ्दो भूमिका कम गर्न सकिने उपयुक्त अवसरका रुपमा लिएको छ भने प्रचण्डले पहिलो कार्यकालमा विग्रेको सम्वन्धलाई पिक अप गर्ने अवसरका रुपमा लिएका छन् ।

भारतीय मिडियाहरुले प्रचण्डले प्रधानमन्त्रीको दोस्रो कार्यकालमा आफ्नो पहिलो विदेश भ्रमण भारतलाई वनाएकोमा खुशि व्यक्त गरेका छन् । प्रचण्डको प्रसंशासंगै भारतीय मिडियाहरुले के पी ओलीलाई चीन समर्थक भनेर विल्ला भिर्न भने छोडेका छैनन् । चीन समर्थक मानिने के पी ओलीले नेपाललाई भारतसंगको निर्भरता कम गर्न चीनसंग महत्वपूर्ण सम्झौता गरेको,ओलीको शासनकालमा लामो समयसम्म नेपाल–भारत सीमा गतिरोध रहेको, ओलीले भारत सरकारलाई इन्धन र कारोबारमा रोक जस्ता आरोप लगाएको भन्दै ओलीको सत्तोसराप गर्न भारतीय मिडियाहरुले अझैं छोडेका छैनन् ।