काठमाण्डु –एमालेले नेपालका लागि भारतीय राजदूतमा पुनः दीपकुमार उपाध्यायलाई पठाउने निर्णयमा असहमति जनाएको छ ।

संसदीय सुनुवाई विशेष समितिमा एमाले सांसदले उपाध्यायले समग्र मुलुकको प्रतिनिधित्व गर्न नसक्ने र उनी मुलुकको हितका पक्षमा समेत नरहेको भन्दै उनको नाममा असहमति जनाएको हो । यद्यपि समितिको बहुमतले उपाध्यायको नाम अनुमोदन गरेको छ ।

तत्कालीन केपी ओली नेतृत्वको सरकारले भारतमा बसेर नेपालको सत्ता परिवर्तनको चलखेलमा लागेको र नेपालका लागि भन्दा पनि अरुकै लागि काम गरेको भन्दै उपाध्यायलाई फिर्ता बोलाएको थियो । तर, काँग्रेस–माओवादी गठबन्धनमा पुष्पकमल दाहाल ‘प्रचण्ड’ प्रधानमन्त्री बनेपछि सरकारले पुनः उपाध्यायलाई नै भारतको राजदूतमा सिफारिस गरेको हो ।

एमाले प्रमुख सचेतक भानुक्त ढकालले उपाध्यायलाई भारतको राजदूतमा पठाउनु मुलुककै लागि दुर्भाग्यपूर्ण भएको टिप्पणी गरे । उनले बहुमतले राजदूत बनाएका व्यक्तिले समग्र मुलुकको प्रतिनिधिका रुपमा काम गर्नै नसक्ने दाबी गरे ।

‘भारतमा बसेर नेपालको सरकार फेर्ने काममा उहाँ लाग्नुभएको थियो र नेपालका लागिभन्दा अरुकै लागि काम गर्नुभएका कारण त्यतिबेला सरकारले फिर्ता बोलाएको हो’, ढकालले काठमाण्डु टुडेसँग भने, ‘अहिले फेरि उनैलाई राजदूतमा पठाउने कुरा राजनीतिक रुपमा प्रतिशोधपूर्ण त छँदैछ, कूटनीतिक रुपमा समेत नेपालको शिर निहुरिने अवस्था आएको छ ।’ केपी ओली सरकार ढाल्न योगदान गरेबापत पुरस्कार स्वरुप उपाध्यायले फेरि रादजूत पद पाएको आरोप उनले लगाए ।

ढकालले उपाध्यायको नाम सिफारिस भएदेखि नै आफूहरुको विरोध रहँदै आएको भन्दै विरोध कायमै रहने जनाए । पूर्वमन्त्रीसमेत रहेका उपाध्याय काँग्रेस नेता हुन् ।