दसैँको लागि मुस्ताङबाट ल्याइएको भेडा च्याङ्ग्राको अभाव भएको छ । भक्तपुरमा झण्डै दुई हजार वटा भेडा–च्याङ्ग्रा बेच्न ल्याएकोमा पशु अधिकारकर्मीका नाममा एउटै समूहले ६ सय वटा च्याङग्रा किनेर लगेपछि अभाव भएको हो ।

हिजो बुधबार हेलम्बुको जंगलमा लगेर च्याङ्ग्रा छाडिदिने र अरुलाई पनि पशु वध नगर्न आग्रह गर्ने भन्दै आएको समूहले प्रति च्याङ्ग्रा १९ हजार रुपैयाँका दरले १ करोड १४ लाख रुपैयाँमा ६ सय वटा च्याङ्ग्रा लगेको व्यापारी श्यामभक्त श्रेष्ठले बताए ।

भक्तपुरको सल्लाघारीमा ल्याएको च्याङ्ग्रा प्रति किलो सात सय रुपैयाँ र भेडा प्रतिकिलो पाँच सय ५० देखि ६ सय रुपैयाँसम्ममा बिक्री भएको छ । भक्तपुरमा झण्डै ४ सय च्याङ्ग्रा मात्र बाँकी भएको र यो भोली शुक्रबारसम्म सकिने भएकाले फूलपातीदेखि नै च्याङ्ग्राको अभाव हुने व्यापारी विष्णुभक्त श्रेष्ठले बताए ।