नेपाली कांग्रेसका सभापति शेरबहादुर देउवाले पार्टीका आन्तरिक विवाद मिलाउन नेकपा माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्डसँग साहारा मागेका छन् । वरिष्ठ नेता रामचन्द्र पौडेल, नेता कृष्णप्रसाद सिटौला र खुमबहादुर खड्काले राज्यमन्त्रीमा भाग खोजेपछि देउवाले प्रचण्डको सहारा मागेका हुन् ।
प्रधानमन्त्री प्रचण्डले कांग्रेसबाट ८ राज्यमन्त्री मागेका छन् । तर देउवाले भने आन्तरिक विवाद मिलाउन ९ मन्त्रालय दिन आग्रह गरेका छन् । भागबन्डामा परेका मन्त्रालय मध्ये ५० प्रतिसतमा मात्र राज्यमन्त्री राख्ने सर्त अगाडी ल्याउँदै प्रचण्डले देउवाको प्रस्ताव अस्वीकार गरिदिएको स्रोतले बताएको छ ।
कांग्रेसमा वरिष्ठ नेता रामचन्द्र पौडेलले ४ सिटौला र खड्काले एक एक राज्यमन्त्री माग गरेका छन् । तर देउवा आफ्नो पक्षबाट पाँच, पौडेल पक्षलाई २ र सिटौला पक्षलाई एक दिने तयारीमा छन् । देउवाको यो प्रस्तावलाई पौडेलले अस्वीकार गरेपछि उनी समस्यामा परेका छन् ।
दशै अगाडी राज्यमन्त्रीलाई सपथ खुवाउने तयारी देउवाले गरेका थिए । तर आन्तरिक विवाद मिलाउन नसकेका कारण उनले राज्यमन्त्रीको नाम सिफारिस गर्न सकेका छैनन् । तर राज्यमन्त्रीका लागि पौडेल पक्षले चार नाम सभापति देउवालाई पठाईसकेको छ । कपिलवस्तुका सुरेन्द्र आचार्य, काभ्रेका कञ्चन बादे श्रेष्ठ, झापाकी सरिता प्रसाईं र कास्कीका जीवन परियारको नाम पौडेल पक्षले बुझाएको छ ।
उता देउवा कैलालीका दीर्घराज भाट, रूपन्देहीका अब्दुल रज्जाक, मोरङका दिलीप गच्छेदार, गुल्मीका सुवर्ण ज्वारचन, तनहुँका ध्रुव वाग्ले, सुनसरीका सीताराम मेहता र मीन विश्वकर्मामध्येबाट राज्यमन्त्री बनाउने पक्षमा छन् । राज्यमन्त्रीका लागि आश्वासन पाएका नेताहरुले दशै अगाडी नै सपथ गराउन दवाव दिँदै आएका छन् । तर पौडेल पक्षको अवरोधका कारण उनले नाम पठाउन सकेका छैनन् ।
