">
- अर्थ सरोकार सम्बाददाता
काठमाडौं – नेमकिपाको जनवर्गीय संगठन नेपाल क्रान्तिकारी युवा संघ केन्द्रीय समितिद्वारा बुधबार आयोजित शुभकामना कार्यक्रमलाई सम्बोधन गर्दै नेपाल मजदुर किसान पार्टीका अध्यक्ष नारायणमान विजुक्छेले भारतीय विस्तारवादविरुद्ध आन्दोलनको घोषणा गरेका छन् ।
अध्यक्ष बिजुक्छेले अहिलेको पुष्पकमल दाहाल सरकारले भारतीय विस्तारवादसामु आत्मसमर्पण गर्दा भारतीय राजदूतावासको चलखेल बढेको भन्दै अबको आन्दोलन सीधै भारतीय दूतावास केन्द्रित हुने घोषणा गरे ।
उनले अहिलेका प्रधानमन्त्री भारतको कठपुतली बनको र गएको ६०–७० वर्षमा भारतीय विस्तारवादले गर्न नसकेको काम अहिले दाहालमार्फत गरेको आरोप लगाएका छन् ।
नेपालका प्रधानमन्त्रीको हैसियत भारतीय राजदूतले गिराएको भन्दै उनले भारतीय विस्तारवादविरुद्ध संघर्ष र आन्दोलन गर्नुपर्ने स्थिति आएको र त्यसको लागि तयार रहन युवाहरुलाई निर्देशन दिएका छन् ।
अबको आन्दोलन प्रधानमन्त्री, त्यसको कार्यालय बालुवाटार र सिंहदरबार नभई सीधै भारतीय दूतावास केन्द्रित गर्नुको विकल्प भएको उनको भनाइ थियो ।
