काठमाडौं – बिहीबार मन्त्रालयमा भएको पत्रकार सम्मेलनमा नेपाली काग्रेंसका प्रभावशाली नेता एवंम स्वास्थ्यमन्त्री गगन थापाले अवको छ महिनाभित्र नेपालमा नै कलेजो प्रत्यारोपण गर्ने भन्दै आफ्ना योजनाहरु प्रस्तुत गरेका हुन् । नेपालमा कलेजो प्रत्यारोपण गर्ने सुविधा छैन त्यसकारण भारत जानुपर्ने बाध्यता हटाउन थापाले सो कदम चालेका हुन् । 

उनले स्वास्थ्यसेवा सम्बन्धिका भावी महत्वकांक्षी योजनाहरु पनि सार्वजनिक गरेका छन् । स्वास्थ्यमन्त्री थापाले स्वास्थ्य सेवा विस्तारका लागि तीन महिनाभित्र थप एक सय १० सामुदायिक स्वास्थ्य इकाइ स्थापना गर्ने र छ महिनाभित्र पाँच सय स्वास्थ्य चौंकीमा नसर्ने रोगको प्रारम्भिक परिक्षण ल्याब निर्माण गर्ने बताएका छन् । 

स्वास्थ्यमन्त्री थापाले छ महिनाभित्रमै प्रत्येक अस्पताललाई आफ्नै फार्मेसी सञ्चालन गर्न लगाउँने समेत दावी गरेका छन् ।

त्यस्तै तत्काल लोकसेवा आयोगलाई जानकारी गराएर केन्द्र, क्षेत्र, उपक्षेत्र, अञ्चल र जिल्लमा गरी जम्मा देशमा हाल चार सय विशेषज्ञ चिकित्सकलाई बढाउँन लागि आवेदन खुल्ला गर्ने थापाको आगामी योजना रहेको छ । 

उनले सरकारी अस्पतालको बहिरंग सेवालाई सुधार गर्दै बिहान १०–५ बजेसम्मको सेवा अनिवार्य सञ्चालन गर्न निर्देशन दिएका छन् । थापाले तीन महिना भित्र अस्पतालमा टिकट काट्ने मानीसहरुको भीड कम गराउन टोकन सिस्टम लागू गर्ने र केन्द्रीय अस्पतालदेखि सबै प्राथमिक स्वास्थ्य केन्द्रमा इलेक्ट्रोनिक मेसिन जडान  गर्ने प्रतिवद्धता जनाएका छन् ।