काठमाडौँ- भारतले थालेको ‘आतंकवाद विरुद्धको अभियान’मा साथ दिन नेपालका राजनीतिक पार्टीहरु भित्र काठमाडौंस्थित भारतीय राजदूतावासले लविङ थालेको छ । उच्च स्रोत अनुसार दूतावासले पाकिस्तानसँग अहिले भारतको चलिरहेको द्वन्द्वको सन्दर्भमा भारतको समर्थनमा पार्टीहरुलाई विज्ञप्ति जारी गराउन पहल गरिरहेको छ ।

भारत र पाकिस्तानबीच तनाव बढ्दै जाँदा भारतीय दूतावास सक्रिय भएपछि नेपालका केही पार्टीहरुले भारतको पक्षमा समर्थन जनाउने अभियान थालेका छन् । यसमा अग्रपंक्तिमा देखिन लागेका छन् मधेस आधारित दलहरु ।

भारत काश्मिरको उरीमा भएको आक्रमणमा १७ जना भारतीय सैनिक मारिएको घटनाको विरोधमा तराई मधेश सद्भावना पार्टी (तमसपा) ले आज एक विज्ञप्ति जारी गरेको छ । असोज २ मा भएको घटनाको विरोधमा १४ दिनपछि यो पार्टीले विज्ञप्ति जारी गर्नु अर्थपूर्ण मानिएको छ ।

पार्टी अध्यक्ष महेन्द्र राय यादवले जारी गरेको विज्ञप्तिमा मारिएका भारतीय सैनिक जवानहरुप्रति श्रद्धाञ्जली अर्पण गर्दै ‘भारतीय जनता र सरकारले आतंकवादविरुद्ध जारी राखेको अडान र संघर्षप्रति आफ्नो नैतिक समर्थन रहेको’ लेखिएको छ ।

कतिपय जानकारहरुले अब अन्य मधेस आधारित पार्टीले पनि भारतको समर्थनमा विज्ञप्ति जारी गर्ने आँकलन गरेका छन् ।