काठमाडौँ – लोकमानसिंह कार्कीलाई महाअभियोग लगाउने वा नलगाउने भन्ने बिषयमा चर्चा परिचर्चा भइरहेका बेला नेपाली कांग्रेसका केन्द्रीय सदस्य खुमबहादुर खड्काले नेपाली कांग्रेस लोकमानसिंह कार्कीविरूद्धको महाभियोगको विपक्षमा उभिनुपर्ने बताएका छन् । लोकमानविरूद्ध लगाइएको महाभियोगको कुनै औचित्व नभएको भन्दै उनले कांग्रेस महाभियोगको विपक्षमा रहेको बताएका हुन् ।

‘लोकमानलाई अहिले महाभियोग लगाउनु भनेको आएनएजीओ, एनजिओ र पश्चिमा मुलुकको दबाब र प्रभावमा ल्याइएको हो,’ उनले भने, ‘एमालेको षडयन्त्रभित्र कांग्रेस फस्नु जरूरी छैन । ‘यदि उनी गलत थिए भने उनलाई नियुक्ति गर्ने नेताहरू कसरी सही हुन सक्छन्?’ सोमबारदेखि सुरू भएको केन्द्रीय समितिको बैठकमा मंगलबार बोल्दै खड्काले भने ।

उनले अगाडी भने, ‘यदि लोकमान गलत हो भने उनीमाथि छानबिन र कारबाही गर्नु परेन। नियुक्ती गर्ने मान्छे सही र नियुक्त भएको मान्छे गलत भन्ने हुन्छ? आफूमाथि छानबिन हुनसक्ने डरले माओवादी-एमालेले यो प्रस्ताव ल्याएका हुन् । हिजो कांग्रेसका नेताहरूलाई पर्दा ठीक र अहिले एमालेका केही नेताहरूलाई पर्दा गलत कसरी हुनसक्छ? अख्तियार प्रमुखकका लागि यदि लोकमानको अयोग्यता हो भने त्यो मुद्दा अदालतमा विचारधिन छ। त्यसलाई अदालतले नै फैसला गर्छ ।’ उनले भने  ।