काठमाडौँ – माओवादी केन्द्रका सांसद महेन्द्रबहादुर शाहीले आफूलाई ज्यान मार्ने धम्की आएको बताएपछि सुरक्षा संयन्त्रमा खैलाबैला मच्चीयो ।

प्रधानमन्त्रीको पार्टीका नेता त्यसमा पनि सांसदमाथि ज्यान मार्ने धमकी आउनु सुरक्षा निकायका लागि टाउको दुःखाइको विषय हुने नै भयो । शाहीमाथि ज्यान मार्ने धम्की आएपछि प्रहरी मुख्यालयले सांसदमाथि सो धमकी दिनेको खोजी गर्न आफ्ना देशभरका युनिटमा सर्कुलर गर्यो ।

तर, खबर आयो कतैबाट पनि धम्की आएको पुष्टी भएन । प्रहरी मुख्यालयले यत्तिमा चित्त बुझाएन र कल डिटेल खोज्न थाल्यो । शाहीको मोबाइल नम्बर (९८५११७७७३३) मा एक हप्ताभित्र आएका टेलिफोन रेकर्ड मगाएर प्रहरीले अनुसन्धान गर्यो । तर, शाहीको दाबी प्रमाणीत हुन सकेन ।

प्रहरी व्रवक्ता डिआईजी हेमन्त मल्लले समाचारमा आएजस्तो शाहीमाथि ज्यान मार्ने धम्की आएको पुष्टी नभएको बताए । उनले शाहीले सुरक्षाका लागि प्रहरीमा समेत कुनै जानकारी नदिएको बताए ।

‘आज मैले बुझेको छैन’, मल्लले काठमाण्डु टुडेसँग भने, ‘हिजो (सोमबार) सम्म कतै रिपोर्ट परेको छैन ।

धम्की आएको भए किन सुरक्षा माग्दैनन् शाही ? उनले ज्यान मार्ने धम्की आएको संचारमाध्यममार्फत खुलासा गरेता पनि प्रहरी समक्ष सुरक्षा मागेका छैनन् । प्रहरीले पनि शाहीलाई सुरक्षा चाहिएको नचाहिएको सोधेको छैन । ‘सुरक्षा भएन भने सुरक्षा दिने हो, ‘मल्लले भने, ‘अहिलेसम्म उहाँले सुरक्षा माग्नु भएको छैन ।’

कसरी सार्वजनिक भएको थियो दाबी ?

सिंहदरबारस्थित सभामुखको कार्यकक्षमा शाहीले आइतबार आफूलाई ज्यान मार्ने धम्की आएको दाबी गरेका थिए । शाही अख्तियार प्रमुख लोकमानसिंह कार्कीविरुद्ध संसदमा दर्ता भएको महाअभियोग प्रस्तावको प्रस्तावक हुन् । सोही प्रस्ताव दर्ता गराएकाले धम्की आएको उनको दाबी छ ।