">
अर्थ सरोकार सम्बाददाता
- अर्थ सरोकार सम्बाददाता
काठमाण्डौ – सहरी विकासमन्त्री अर्जुननरसिंह केसीले मधेशी मोर्चासहितको सहमतिमा छिट्टै संविधान संशोधन हुने बताएका छन् । विराटनगरमा प्रेस युनियन मोरङले मंगलबार गरेको पत्रकार सम्मेलनमा बोल्दै केसीले औचित्यका आधारमा संविधान संशोधनको तयारी सरकारले गरिरहेको बताएका छन् ।
दलहरुबीच निश्चित समयसीमा भित्रै ३ वटा निर्वाचन गर्नुपर्ने बाध्यता छ,’ केसीले भने, ‘जसका कारण पनि संविधान संशोधनमा सबैले सहयोग गर्नुपर्छ।’ अन्तरिम संविधान २०६३ कै सेरोफेरोमा संविधान संशोधनको तयारी भइरहेको उनले जानकारी दिए ।
अहिले बाहिर आएको अंगीकृत नागरिकलाई राष्ट्र प्रमुख या अन्य संवैधानिक निकायको माथिल्लो तहमा पुग्ने अधिकार दिने विषयमा कुनै सहमति नहुने र कांग्रेसले नमान्ने केसीको धारणा थियो। राष्ट्रिय भाषा आयोगले गर्ने सिफारिसका आधारमा नेपालमा बोलिने भाषाहरुलाई राष्ट्र भाषाको मान्यता दिइने र नेपाली भाषा नै राष्ट्रिय भाषा हुने बताउँदै केसीले हिन्दी भाषाको विषयमा पनि सोही आधारमा निर्णय गरिने बताए ।
सहरी विकासमन्त्री केसीले ४२ प्रतिशत जनसंख्या सहरमा भएपनि अहिलेका महानगरपालिका तथा नगरपालिकाले जनतालाई न्यूनतम सूविधा दिन नसकिरहेको बताए। यसका लागि तत्कालै सरकारले राष्ट्रिय सहरी विकास रणनीति बनाउने तयारी गरेको बताए ।
सोही रणनीति अनुसार जनता आवास कार्यक्रम पनि लागू हुने र २० हजार निम्न आर्थिक अवस्था भएका जनतालाई घर हस्तान्तरण गरिने बताए। यस्तै, सहरको विकासका लागि छाता प्राधिकरण ऐन पारित गर्ने चरणमा सरकार रहेको बताउँदै विराटनगरलाई पनि विकास प्राधिकरण जरुरी भएको औंल्याए।
