">
वैदेशिक रोजगारीमा जान श्रम स्वीकृति लिन मध्यरातसम्म सेवाग्राही लाइनमा बसेका छन् । बिहीबार रातिसम्म पनि स्वीकृति नपाउँदा विदेश जान लागेका केही कामदारले टिकटसमेत रद्द गरेका छन् । दसैँ, तिहार र छठको बिदामा काम नभएकाले श्रम स्वीकृतिका लागि वैदेशिक रोजगार विभागको कार्यालय ताहाचलमा सेवाग्राहीको भीड लागेको हो । वैदेशिक रोजगारीमा जानेले विभागबाट पूर्वस्वीकृति र अन्तिम स्वीकृति लिनुपर्ने व्यवस्था छ ।
अन्तिम स्वीकृति लिन गएका सेवाग्राही मध्यरातसम्म लाइनमा बसेका हुन् । स्रोतका अनुसार विभागको कार्यालयमा पूर्व र अन्तिम स्वीकृति लिन आठ हजारसम्म फाइल कार्यालयमा चाङ लागेका छन् । श्रम स्वीकृति लिन बिहान विभागमा पुगेकाहरू मध्यरातमा काम सकेर फर्किएका थिए । शुक्रबार ११ बजे साउदी अरब जाने टिकट लिएर बसेका मोरङका अम्बर राईले स्वीकृति लिन निकै दुःख पाएको गुनासो गरे । मध्यराती कार्यालय अगाडि भेटिएका उनले भने, ‘दिउसो दुई बजेदेखि लाइनमा बसेका थिएँ ।’
खोटाङकी निर्मला राईले पनि विरामी बच्चालार्ई छोडेर बिहानैदेखि खाना समेत नखाई लाइनमा बसेको बताइन् । लाईनमै रहेकी राइले बिरामी बच्चा छोडेर दिनभर लाइनमा बस्दा पनि रातिसम्म श्रम स्वीकृति नपाएको बताइन् । उनले भनिन, ‘बच्चा बिरामी छ, लेडिजलाई प्राथमिकता दिनुस भनें कसैले सुनेनन् ।’ उनको पनि शुक्राबर बिहान १० बजे साउदी अरबका लागि फ्लाइट छ । चाडपर्वको विदा तथा कार्यालय प्रमुख विदेशमा रहेका कारण श्रम स्वीकृतिका काम रोकिएको कर्मचारीको भनाई छ ।
बुधवार काम सुरु गर्न खोजे पनि प्राबिधिक समस्याका कारण नसकिएको कर्मचारीले बताए । बिहिबारबाट काम सुचारु भएको कार्यालय प्रमुख कृष्ण दवाडिले जानकारी दिए । दवाडिले बिहिबार मध्यराती नया पत्रिकासंग भने, ‘म कार्यालयमै छु, अहिले पनि काम गरिरहेको छु ।’ सामान्य अवस्थामा समेत श्रम स्वीकृतिका लागि लामो लाइनमा बस्नुपर्ने बाध्यता छ ।
निर्मला राई, खोटाङ
रोजगारीका लागि साउदी अरब जाने तयारीमा छु । शुक्रबार बिहान १० बजेको फ्लाइट छ । बिहीबार बिहान १० बजेदेखि श्रम स्वीकृतिका लागि लाइनमा लागेँ । बच्चा बिरामी छ, महिलालाई प्राथमिकतामा राखेर काम गरिदिनुप-यो भनेर पनि बिन्ती गरेँ । तर, केही सुनुवाइ भएन । लाइन बस्दा राति यतिवेला (११ः४५) भयो । बालाजु बसेकी छु, यतिवेला गाडी पनि पाउँदैन, साथी पनि छैनन् । ट्याक्सी खोज्नुपर्ने भयो । निर्धालाई जहाँ गए पनि दुःखै छ । राज्यले यस्ता कुरा हेरे हुन्थ्यो ।
