एजेन्सी – जापानको राजधानी टोकियोमा ५४ वर्षपछि हिउँ परेको छ । तापक्रम औसतमा १० देखि १७ डिग्री सम्म रहने यो समयमा हिउँ परेपछि टोकियोबासी अचम्ममा परेको बिबिसीले जनाएको छ ।
मध्य टोकियोमा स्थानीय समय अनुसार बिहान सवा ६ बजेदेखि हिउँ पर्न शुरु गरेको थियो । औसतमा हिमपात शुरु हुने समय भन्दा ४० दिन अघि र गएको वर्ष भन्दा ४९ दिन अघि हिउँ परेको जापान टुडेले जनाएको छ ।
टोक्यो र योकोहामा लगायत पूर्वी शहरहरुमा हिउँ परेपछि यातायात सेवा प्रभावित भएको छ । चिसो बढेपछि बिजुलीको माग ह्वात्तै बढेको टोक्यो ईलेक्ट्रिक पावर कम्पनी टेप्कोले जनाएको छ ।
राजधानी टोक्यो र आसपासका क्षेत्रमा तापक्रम शून्यमा झरेको छ । हिउँ परेपनि तापक्रम माईनसमा नझरेकाले हिउँ नजमेको र यदि हिउँ जमे त्यो ईतिहासमै पहिलो पल्ट हुने समाचारमा उल्लेख छ ।
