काठमाडौँ – आइतबार पनि संविधान संशोधन प्रस्ताव टेवल नहुने भएको छ । सरकारको तयारी अनुसार शुक्रबार नै व्यवस्थापिका संसदमा दर्ता हुनुपर्ने संशोधन प्रस्ताव आइतबारका लागि सारिएको थियो । संशोधन प्रस्तावमा सत्तारुढ कांग्रेस र मधेसी सहमत नभएपछि प्रचण्डले आइतबार बस्ने मन्त्रीपरिषद् बैठकबाट पास गराएर प्रस्ताव सदनमा दर्ता गराउने तयारी गरेका थिए । एमाले भने संशोधन प्रस्तावको विपक्षमा उभिदै आएको छ ।
प्रधानमन्त्री सचिवालय स्रोतका अनुसार कांग्रेस र मोर्चाको सहमति बिना संशोधन प्रस्ताव दर्ता गराउँदा पछि अफ्ट्यारो पर्ने देखेपछि प्रधानमन्त्री ब्याक भएका हुन् । मधेसी मोर्चा सीमांकनको विषयमा स्पष्ट उल्लेख भएको संशोधन प्रस्ताव आउनुपर्ने पक्षमा छ । सरकारले राष्ट्रपतिदेखि मुख्यमन्त्रीसम्मका १३ पदमा वंशज नागरिकले मात्रै प्रतिस्पर्धा गर्न पाउने व्यवस्था तलमाथि नगर्ने गरी संशोधन प्रस्ताव तयार पारेकाले पनि मोर्चा असन्तुष्ट छ ।
तर, तराई–पहाडलाई छुट्याउने गरी प्रस्ताव आए त्यसले समस्या निम्त्याउने देखेपछि प्रचण्ड यतिबेला तनावमा छन् । त्यसैगरी अंगीकृतको विषयमा पनि चोतर्फी विरोध भइरहेको छ ।
प्रचण्डले अहिलेलाई जसरी भएपनि संशोधन प्रस्ताव टेवल गर्ने र चित्त नबुझेको विषयमा मोर्चालाई ‘नोट अप डिसेन्ट’ लेखेर आउने गरी मनाउन खोजेता पनि मोर्चा यसमा सकारात्मक छैन । मोर्चालाई कांग्रेसले समेत साथ दिएपछि प्रचण्ड के गर्ने के नगर्ने भन्ने अन्यौलमा छन् ।
उता तराई–पहाड टुक्राउने प्रस्ताव आए त्यसको विपक्षमा मतदान गर्ने आफ्नै पार्टीका नेताको चेतावनीले प्रचण्डलाई अझ अफ्ट्यारोमा पारेको छ ।
संधोन प्रस्तावको ड्राफ्टलाई अन्तिम रुप दिनका लागि प्रचण्डले कांग्रेस र मधेसी दलका नेतालाई सहमतिमा ल्याउने प्रयास गरिरहेका छन् । उनीहरु सहमतिमा आए मात्र प्रस्ताव दर्ता गराउने उनको तयारी रहेको स्रोत बताउँछ ।
संशोधन प्रस्ताव दर्ता गर्न ढिलाइ भएपछि आगामी योजना तय गर्न मोर्चाको बैठक बस्दै छ । बैठकमार्फत अन्तिम चेतावनी दिने वा आन्दोलनका कार्यक्रम सार्वजनिक गर्ने भन्ने विषय टुंगो लाग्ने एकम नेताले बताए ।
काठमाडौँ टुडे
