काठमाडौँ – प्रधानमन्त्री पुस्पकमल दाहाल प्रचण्डले मधेसी मोर्चाको आग्रह बमोजिम आगामी १५ दिनभित्र संविधान संशोधन विधेयक संसदमा दर्ता गरिने बताएका छन् ।
सोमबार संयुक्त लोकतान्त्रिक मधेसी मोर्चाको स्मरणपत्र बुझ्दै प्रधानमन्त्रीले मोर्चाको स्मरणपत्रलाई आफूले सकारात्मक रुपमा लिएको बताउँदै जायज माग पूरा गर्न आवश्यक पहलकदमी लिइरहेको जानकारी दिए । मधेसी, जनजाति, थारु, दलित, खस लगायतकाको साझा गठबन्धनको तर्फबाट प्रधानमन्त्रीलाई प्रस्तुत गरिएको स्मरणपत्रमा आगामी १५ दिनभित्र संविधान संशोधन विधेयक संसदमा दर्ता गर्न माग गरिएको छ ।
सो अवसरमा मोर्चाका तर्फबाट उपेन्द्र यादवसहितका नेताहरुले संशोधन प्रस्ताव दर्ता गरेपछिमात्रै संसदमा रहेका दलहरुसँग सहमतिको प्रयास थाल्न आग्रह गरेका थिए ।
