काठमाडौं – अधिवेशन चलेका चार दिन बितिसक्दा पनि नेतृत्व चयन हुन् सकी रहेको छैन । सन्दर्भ हो नेपाल तरुण दल को महाधिवेशनको ।  बुधबार पनि बिहानैदेखि कांग्रेस नेताहरु नेतृत्व चयनका लागि छलफलमा जुटेका छन् । मुख्यपदमा भागबण्डा गरेर नेतृत्व चयन गर्न सहमति भएको छ।

 सहमति अनुसार सभापति शेरबहादुर देउवा पक्षले अध्यक्ष सहित पदाधिकारी लिने, वरिष्ठ नेता रामचन्द्र पौडेल पक्षले महासचिव, कृष्णप्रसाद सिटौला पक्षले उपसभापति र खुमबहादुर खड्का पक्षले कोषाध्यक्ष लिनेगरी तरुण दलको नेतृत्व चयन हुने भएको छ ।  दिउँसोसम्ममा सबै समूहको नाम आएपनि नआएपनि अध्यक्ष लगायतका केही पदाधिकारीको नाम सार्वजनिक गर्ने तयारी भएको छ ।

 बाँकी कार्यसमिति पछि टुंगो लगाउने नेताहरुले बताएका छन् । तरुण दलको अध्यक्ष भने जीतजंग बस्नेत बन्ने निश्चित भएको छ। तरुण दलमा ४५ सदस्यीय निर्वाचित र बाँकी मनोनित गरेर ६१ सदस्यीय नयाँ कार्यसमिति चयन हुनेछ ।  प्रक्रिया नबढेपछि देशभरबाट आएका महाधिवेशन प्रतिनिधि पोखरामा अन्यौलमा परेका छन् ।

निर्वाचन प्रक्रिया सुरु गर्नका लागि दलको संशोधित विधान आउने भनिए पनि निर्देशन समितिबाट विधान प्राप्त नभएका कारण निर्वाचन कार्यतालिका सार्वजनिक गर्न नसकिएको निर्वाचन समितिका संयोजक बाबुराजा जोशीले जानकारी दिए ।  तर, नेताहरुबीच पुरानै विधान अनुसार नेतृत्व चयन गर्ने सहमति भएको छ ।