दाङको देउखुरी उपत्यकास्थित लमही बजारमा देउसीभैलो खेल्ने युवायवतीमाथि अभद्र व्यवहार गरेर सम्वेदनशील अंग समात्ने समूहका नाइके पक्राउ परेका छन् ।
स्थानीय कांग्रेसी नेता कर्णबहादुर बुढाथोकीका जेठा छोरा किरण बुढाथोकीले कात्तिक १८ गते मध्यराति देउसीभैलो खेल्ने समूहमाथि यौनजन्य अभद्र व्यवहार गरेका हुन् ।
वडा प्रहरी कार्यालय लमहीका प्रहरी निरीक्षक प्रेमबहादुर खड्काले देउसीभैलोलाई अभद्र व्यवहार भएको उजुरी परेपछि दोषी आरोपित किरण बुढाथोकीलाई अनुसन्धानका लागि पक्राउ गरिएको बताए । ‘यो झै–झगडाको विषय हो’, निरीक्षक खड्काले भने, ‘अनुसन्धान भइरहेको छ । दोषीलाई कारबाही हुन्छ ।’
स्रोतका अनुसार किरण बुढाथोकीसहितको समूहले लमही बजारमा देउसीभैलो खेलिरहेका युवतीहरूमाथि छोडछाड गर्दै बलात्कारको प्रयास गरेपछि हानाहान भएको थियो । लमही बजारका स्थानीय युवाहरूको ‘एम्स डान्स क्लव’का सदस्यहरूले क्लवका लागि भन्दै देउसीभैलो खेलेर रकम संकलन गर्न खोजेका थिए ।
पीडित समूह के भन्छन् ?
देउसीभैलो समूहका युवतीहरूका संवेदनशील अंग छोपेको भन्दै किरण बुढाथोकीविरुद्ध उजुरी परेपछि प्रहरी यो मुद्दालाई कसरी मिलाउने भनेर सक्रिय भएको छ । दुबै समूहलाई मिलाएर बिबाद अन्त्यका लागि प्रहरी निरीक्षक प्रेमबहादुर खड्का लागेका छन् । तर पीडित युवती र आफन्तहरू भने दोषीलाई हदैसम्मको कारबाहीको माग गर्दै आएका छन् । उनीहरूले शक्तिको आडमा युवतीका गोप्य र संवेदनशील अंग छोप्ने समूहका नाइके किरण बुढाथोकीलाई हदैसम्मको कारबाहीको पक्षमा छ ।
युवतीहरूलाई अभद्र व्यवहार गर्ने किरण को हुन् ?
कर्णबहादुर बुढाथोकीका दुई छोरामध्येका जेठा छोरा हुन् किरण बुढाथोकी । शक्तिको दुरुपयोग गर्दै देउखुरी उपत्यकामा काठ तस्करी गर्दै आएका किरणको गतिविधी शंकास्पद हुँदै गएपछि प्रहरी र स्थानीय प्रशासनले निगरानी गर्दै आएको छ । किरणका भाइ सन्तोष बुढाथोकी अहिलेका वनमन्त्री शंकर भण्डारीका स्वकीय सचिव छन् ।
उनै सन्तोषको संरक्षणमा किरणले काठ तस्करीदेखि गुन्डागर्दी गर्दै आएका छन् । मन्त्रीको पिए भएपछि बेलाबेला सन्तोष दाईकै साथ लागेर लमही बजारमा गुन्डागर्दी गर्दै हिँड्ने गरेको आरोप छ । किरण र सन्तोषले अहिले वनमन्त्री शंकर भण्डारीको नाम लिएर लमही बजारमा उदण्डता देखाउन थालेपछि स्थानीय प्रहरी हैरान भएको छ । यो विषय मिलाउन वनमन्त्री भण्डारीले प्रहरीलाई दबाब दिइरहेका छन् ।
प्रहरी समक्ष के भन्छन् किरण ?
किरणले आफू चढेको गाडीलाई रोकेर देउसीभैलो खेल्ने समूहले तोडफोड गरेको दाबी गर्छन् । उनले यही बयान प्रहरीलाई दिएका छन् । अहिले पनि प्रहरी हिरासतमा रहेका किरणले युवतीहरूको संवेदनशील अंग आफूले नछोपेको दाबी गरेका छन् । तर उनको यो दाबीलाई पीडितहरू मान्न तयार छैनन् ।
