काठमाडौं – सरकारले संसदमा दर्ता गरेको संविधान संसोधनको प्रस्तावप्रति मधेशको अर्को दल सदभावना पार्टीले पनि असहमति जनाएको छ । उपेन्द्र यादव नेतृत्वको संघीय समाजवादी फोरमको विरोध आए लगत्तै राजेन्द्र महतोको पार्टी सदभावनाले पनि यसको विरोध गरेको हो ।
सदभावना पार्टिले निकालेको विज्ञप्तिमा भनिएको छ, “सरकार द्वारा प्रस्तुत संविधान संसोधन सम्बन्धि विधेयकले मधेश आन्दोलनको समग्र एजेण्डा, आकांक्षा र मांगलाई सम्बोधन गर्न नसकेको, सत्तारुढ दलहरु भित्रैबाट सम्प्रेषित भैरहेको भावनाले संसोधन विधेयकलाई आत्मसात गर्न नसकेको अवस्थाले हामीलाई चिन्तित तुल्याएको छ ।
संसोधनको सवालमा सरकार तथा प्रतिपक्षले लिने गति र दिशालाई हामी अत्यन्त नजिकबाट निगरानी गरीरहेका छौं । मधेश र मधेशीको समग्र सबालमा सदैब सजग रहदैं विकसित परिस्थिति अनुसार जस्तोसुकै गम्भिर र जिम्मेवारीपुर्ण राजनीतिक कदम चाल्न नेपाल सद्भावना पार्टी सदैब तैयार रहनेछ” ।
