• अर्थ सरोकार सम्बाददाता 

काठमाडौं – प्रधानमन्त्री पुष्पकमल दाहाल प्रचण्डले मंगलबार राष्ट्रिय गौरवका आयोजनाको नियमित अनुगमन र निरीक्षण गर्ने घोषणा अनुरुप पूर्वी नेपालका तीन आयोजनाको स्थलगत निरीक्षण गर्ने भएका छन् ।  समयमै आयोजना सम्पन्न गर्ने प्रधानमन्त्रीको पूर्वघोषणा कार्यक्रम बमोजिम मंगलबार प्रधानमन्त्री प्रचण्डले पूर्वी नेपालका तीन आयोजनाको स्थलगत निरीक्षण गर्ने कार्यक्रम रहेको नीजि सचिवालयले जनाएको छ ।

निर्माणाधीन ४५६ मेघावाटको तामाकोशी जलविद्युत् आयोजना, तेह्रथुम बसन्तपुरबाट नेपालको उत्तरी नाका जोड्ने १ सय ६२ किलोमिटर लामो उत्तर दक्षिण कोशी लोकमार्ग र संखुवासभाको सडक निरीक्षण र सरकारी कार्यालयका प्रमूखहरुलाई निर्देशन दिने कार्यक्रम तय भएको सचिवालयले जनाएको छ ।

निरीक्षण एवं अनुगमनका क्रममा प्रधानमन्त्रीले आयोजनाहरुको प्रगति अवस्था, समस्या, चुनौति र सरकारको तर्फबाट गर्नुपर्ने सहयोगका बारेमा छलफल र विशेष निर्देशन दिनेछन् ।