• अर्थ सरोकार सम्बाददाता 

काठमाडौं – मलाई विगतको ब्याकग्राउण्ड कसको के हो थाहा छैन तर न्यायाधीश नियुक्ति गर्दा पार्टी होइन, विज्ञता ख्याल गर्ने हो । भारतमै मन्त्री भइसकेका व्यक्ति पनि न्यायाधीश भएको उदाहरण छ ।

बुहारीलाई घुम्टो ओढाएर राख्ने अनि समावेशी समानुपातिकमा नियुक्ति हुनुपर्छ भनेर हुँदैन । न्यायाधीशलाई मन्त्री पदसित दाँज्न हुँदैन ।न्यायपालिका समावेशी र समानुपातिक हुनुपर्छ भन्ने कुरामा म पनि सहमत छु तर न्यायाधीश नियुक्ति गर्दा व्यक्तिको सक्षमता, विज्ञता, अध्ययन कसैलाई ख्याल गरिनुपर्छ समावेशी समानुपातिकका नाममा आलोकाँचोलाई न्यायाधीश बनाउन सकिदैन् ।

भ्रष्टाचार वा घुस लेनदेनमा दिने र लिने दुवै उत्तिकै दोषी हुन । एउटा पोखरीमा फोहोर भ्यागुता पस्यो भने पोखरी गनाउँछ । त्यस्तै न्याय क्षेत्रमा रहेका केही मुठीभर गलत व्यक्तिका कारण पुरै न्यायपालिका बद्नाम भइरहेको छ । तराईका जिल्लामा मुद्धा हार्यो कि घुस खाएको आरोप लगाइदिने चलन छ ।

प्रधानन्यायाधीशको नियुक्ति छोटो अवधिका लागि हुने गरेका कारण धेरै सुधार गर्न सकिने अवस्था छैंन । जेभएपनि म आफ्नो कार्यकाल अबधिभर न्यायमा जनताको सहज पहुँचका लागि प्रयास गरिरहनेछुँ ।