बालुवाटारमा प्रमुख तीन दलको बैठक सुरू

अर्थ सरोकार संम्वाददाता

काठमाडौं – प्रधानमन्त्रीको सरकारी निवास बालुवाटारमा प्रमुख तीन दलको बैठक सुरू भएको छ । केहीबेर अघि सुरु भएको बैठकमा नेपाली काँग्रेस, नेकपा माओवादी केन्द्र र नेकपा एमालेका पहिलो र दोस्रो तहका नेताहरु सहभागी छन् ।

विहान ११ बजे नै बैठक सुरु हुने भनिएपनि एमाले अध्यक्ष केपी ओली एक घण्टा ढिलो गरी पुगेपछि बैठक ढीलो सुरु भएको प्रधानमन्त्रीको प्रेस सल्लाहकार गोबिन्द आचार्यले जानकारी दिए ।

काँग्रेस सभापति शेरबहादुर देउवा, एमाले नेताहरु झलनाथ खनाल र माधवकुमार नेपाल ११ बजे नै बालुवाटार पुगेका थिए । बैठकमा संविधान संसोधन विधयेक, महाअभियोग प्रस्ताव र चुनावका विषयमा प्याकेजमा छलफल हुने नेताहरुले बताएका छन् ।

तत्काल चुनाव घोषणा हुनुपर्ने माग गर्दै आएको एमालेलाई आज सत्तारुढ दलले तिनै तहको चुनावको मिति सहितको कार्यतालिका दिएर छलफल गर्ने तयारी गरेका छन् । बैठकले गतिरोध अन्त्यका लागि ठोस निश्कर्ष निकाल्ने नेताहरुको भनाई छ ।