दुर्गा प्रसाद काफ्लेज्यू, नमस्कार ! 

तपाईंले दिनुभएको अन्तर्वार्ताको दुवै भाग हेरें । त्यसपछि केहि भन्न मन लाग्यो । अन्तर्वार्ता हेर्दै गर्दा यति रिस उठ्यो कि यति नलेखी बस्नै सकिन । जहिले पनि बजारमा नकारात्मक कुरा गर्ने तपाईंका तर्कहीन कुराहरु सुनेर दया पनि लाग्यो । तपाईंलाई सेयर बजार बुझेको मान्छे सोचेको थिएँ । तर बजार घट्छका पछाडी कारणहरु स्पष्ट पार्न सक्नु भएन । दुवै भागका अन्तर्वार्तामा तपाईंले अरुलाई गाली गरेर नै समय विताउनुभयो ।  

अनलाइन ट्रेडिङ भन्ने कुरा हावा हो भन्ने तपाइंको कु तर्कलाइ म के उपमा दिउँ काफ्लेज्यू । बजार घटेर लगानीकर्ता निरास भएका बेला तपाईंको जस्तो भनाइ आयो, त्यो म जस्तै धेरैलाई तर्कहीन लागेको कुरामा दुइमत छैन । सेयर बजारमा गैरआवासीय नेपालीको लगानी भित्र्याउने कुरामा सबैको सहमतिका साथ कामहरु अन्तिम चरणमा भएका बेला त्यो हुने सक्दैन भन्नु कहाँसम्मको मुर्खता हो, तपाईं आफैं मनन गर्नुहोस् ।

बेतुकको गाली गर्नुभन्दा अघि तपाईंले किन सोच्नुभएनकि बाणिज्य बैंकहरुलाई सेयर दलालको रुपमा काम गर्न दिने कुरामा सबैको सहमति  भईसकेको छ र मार्जिन कर्जा पनि सेयर दलाल मार्फत नै प्रबाह हुने कुरामा पनि सबैको सहमती भइसकेको छ । के यसले बजार माथि लाँदैन र ? यसको जवाफ छ तपाईंसँग ?  

तपाईंले उठाएका केहि जायज कुरा पक्कै छन् ।  नेपाल धितोपत्र बोर्डमा भ्रष्टाचार छैन भन्ने मेरो तर्क होइन। तर जे कुरा गर्दा पनि बजार घट्छ भन्नु कतिसम्मको अबुझपन हो, मैले बुझ्न सकिन ।  तपाईंलाई त थाहा नै होला लगानीकर्ता पहिचान कार्ड बितरण प्रक्रिया अन्तिम चरणमा छ । यसले समग्र लगानीकर्ताको सुरक्षा प्रत्याभुति र बजारमा आउनेहरुको पहिचान गराई अझै बिस्वसनीय वातावरण तयार पार्नेछ भन्ने कुरा कसरी बिर्सनुभयो वा कसरी बिर्सन सक्नुहुन्छ र ?

खुसी लाग्यो, तपाईं आफ्नो मत व्यक्त गर्न नवलपरासीदेखि काठमाडौँसम्म आइपुग्नुभएको रहेछ । तपाईंलाइ त यो कुरा थाहा नै हुनुपर्ने हो कि बिस्तारै बजार देशका पचहत्तरै जिल्ला जान पाउने र उनीहरुको कार्य क्षेत्र बिस्तार हुने नै छ । यसले बजार बढाउँदैन र ?

तपाईंलाइ थाहा छ कि छैन कुन्नि ! थाहा नभए थाहा पाउनुहोस् ‘बिमा कम्पनीहरुका लागि पूजी बृद्धि योजना अब चाँडै आउनेवाला छ । यसले बजार कसरी बढ्न मद्दत गर्छ एक पटक राम्रोसँग बुझ्नुहोला ।  अरु थुप्रै कारण छ बजार बढ्ने, यो कुरा पनि ध्यान दिनुहोला । राम्रोसँग बुझेर मात्र प्रतिक्रिया दिनुहोला । नत्र कुन दिन जनताले अगुल्टोले हिर्काउलान्, विचार गरौ है । फेरी उही रातो भुंग्रोबाट नै निकालेको अगुल्टोल तपाईंलाइ जनताले हिर्काउलान् नि !

उही तपाईंको अन्तर्वार्ता कुतर्कनै कुतर्क लागेको लगानीकर्ता 

सुजन महर्जन