काठमाडौं । नेपाली कांग्रेस नेता तथा स्वास्थ्यमन्त्री गगन थापाले देशका गरीब नागरिकहरुका लागि पनि उपचार खर्च जुटाउने तयारी थालनी गरेका छन् ।

स्वास्थ्यमन्त्री थापाले नागरिक उपचार सहायतासम्बन्धि कार्यविधि अर्थ मन्त्रालयमा पठाइसकेका बताएका छन् । अब, अर्थ मन्त्रालयमा पठाएको प्रस्ताव पास भएर आए नागरिकले उपचार खर्च वापत ५ लाख पाउने थापाले बताए ।

उता, सरकारले पूर्वविशिष्ट तथा विशिष्ट व्यक्तिहरुलाई मनोमानी ढङगले उपचार खर्चवापत करोडौं रकम उपलव्ध गराइदै आएको कार्यविधि संशोधनसहित पारित गरिएको छ । शुक्रबार मन्त्रिपरिषद्को विधेयक समितिले संशोधनसहित पारित गरेको हो । यससँगै स्वास्थ्य मन्त्रालयले राष्ट्रका पूर्व तथा अन्य विशिष्ट व्यक्तिका लागि १५ लाख मात्रै उपचार खर्च दिने नीति अगाडि बढाइएको छ ।

विशिष्ट व्यक्तिहरुलाई विदेश उपचार खर्च वापत १५ दिने निर्णयपछि विशिष्टहरुले स्वदेशमा उपचार गरेको खण्डमा भने स्वास्थ्यमन्त्रालयले उपचार खर्च उपलब्ध नगर्ने भएको छ । त्यस्तै, साहित्य,संगीत,कला,राजनीति, सार्वजनिक प्रशासनलगायत सामाजिक र राष्ट्रिय जीवनमा उल्लेख्य योगदाना पुर्याएका व्यक्तिहरुलाई रोगको प्रकृति हेरी पाँच लाख उपचार खर्च दिने भएको छ ।