बाँके – बाँके वनकट्वामा झण्डै रू. तीन करोड लागतमा अदुवा प्रशोधन कारखाना स्थापना हुने भएको छ । साना तथा मझौला कृषक आयस्तर वृद्धि आयोजनाको आर्थिक सहयोगमा नवजीवन एग्रो प्रालि, कोहलपुरले वनकट्वा ५ मा अदुवा कारखाना स्थापना गर्ने भएको हो ।

अदुवाको राष्ट्रिय तथा अन्तरराष्ट्रिय क्षेत्रमा निर्यात बढाउन, स्वदेशमा रोजगार र आम्दानीको अवसर प्रदान गर्न कारखानाको स्थापना गर्न लागिएको प्रालि अध्यक्ष दिपकराज भण्डारीले जानकारी दिए । उनका अनुसार ताजा अदुवा, सुठो, धुलो, पाउडर, पेष्ट लगायतका सामग्रीहरु उत्पादन गरी बजारमा पठाइनेछ । अदुवा व्यवसायी सङ्घ मार्फत बजारीकरणलाई अगाडि बढाइने उनको भनाई छ ।

अदुवा कारखानाका लागि नवजीवन प्रालिमा ‘जिन्जर प्रोसेसिङ एण्ड मार्केटिङ’ उपआयोजना लागू गरिएको छ । उपआयोजनाको लागत २ करोड ९० लाख १३ हजार २ सय ५६ रुपैयाँ ८३ पैसा रहेको छ । जसमध्ये ६७ लाख २३ हजार ८७ रुपैयाँ ९ पैसा रिजमएफपीको सहयोग छ भने बाँकी २ करोड २२ लाख ९० हजार १ सय ६९ रुपैयाँ ७४ पैसा प्रालिले व्यहोर्नेछ ।

प्रालिले अदुवा कारखानाका लागि दैलेखका २ ओटा, सुर्खेत र सल्यानका १÷१ ओटा सहकारी गरी ४ ओटा सहकारीसँग अदुवाका लागि सम्झौता समेत गरेको छ ।