- अर्थ सरोकार संम्वाददाता
काठमाण्डौ – गुल्मीका प्रमुख जिल्ला अधिकारी कृष्णप्रसाद ढुंगानाले माफी मागेका छन् । प्रहरी प्रशासनबाट प्रहरी र बन्दकर्ताबीच भएको झडप प्रति दुख व्यक्त गर्दै उनले प्रहरी र प्रशासनबाट कमजोरी भएको स्वीकार गर्दै माफी मागेका हुन् ।
शनिवार सांसद कमला बिश्वकर्मासहित संयुक्त संघर्ष समिति, विभिन्न राजनीतिक दलका प्रमुखहरु लगायतको उपस्थितिमा बसेको बैठकमा प्रजिअ ढुंगानाले आगामी दिनमा यस्ता घटना नदोहोरिने बताए ।
शुक्रबार गुल्मीको सदरमुकाम तम्घासमा जिल्ला प्रशासनमा ताला लगाउन खोज्दा आन्दोलनकारी र प्रहरीबीच झडप भएको थियो । प्रहरीले लाठीचार्ज गर्नुका साथै अश्रुग्यास हानेको थियो ।
संयुक्त संघर्ष समितिले घटनामा प्रमुख जिल्ला अधिकारी ढुंगाना दोषी भएको भन्दै माफी माग्नु पर्ने माग राखेको थियो । प्रजिअले माफी नमागेका अन्य विषयमा छलफलन नहुने उसको अडान थियो ।
