काठमाण्डौ – सरकारले संविधान संसोधन मार्फत गरेको सिमांकन हेरफेरको विरुद्धमा सुरु गरिएको अनिश्चितकालिन बन्दले गुल्मीको जनजीवन थप कष्टकर बन्दै गैरहेको छ ।

सरकारले संसदमा संशोधन प्रस्ताव दर्ता गरी पाँच नम्बर प्रदेशबाट गुल्मीलगायत पहाडी जिल्लाहरुलाई टुक्राउन लागेको भन्दै गरिएको अनिश्चितकालीन गुल्मी बन्दको शुक्रबार १० औं दिन पुगेको छ । १० दिनको लामो बन्दले गुल्मीको जनजीवन अस्तव्यस्त बनेको हो ।

आन्दोलनको १० औं दिन शुक्रवार संयुक्त आन्दोलन परिचालन संघर्ष समितिको आयोजनामा जिल्लाका आठ वटा ग्रामिण क्षेत्रका मुख्य(मुख्य स्थानहरुमा विरोध सभाको आयोजना समेत गरिएको छ ।

बन्दका कारण जिल्लाका सम्पूर्ण शिक्षणसंस्था, बजार, उद्योग कलकारखानालगायत यातायात सेवा ठप्प हुँदा सर्वसाधारणहरु सास्ती भोग्न बाध्य भएका छन् । आन्दोलनकर्ताहरुले दिनहुँ जिल्ला प्रशासन र जिल्ला विकास समितिको कार्यालय अगाडि धर्ना दिने र फरक–फरक प्रकृतिका प्रदर्शन गरेर विरोध जनाउँदै आएका छन् ।

संयुक्त आन्दोलन परिचालन संघर्ष समितिका संयोजक भुवनप्रसाद श्रेष्ठका अनुसार संसदमा दर्ता गरिएको संशोधन प्रस्ताव फिर्ता नगर्दासम्म गुल्मी बन्दको कार्यक्रम यथावत् राखिने तथा धर्ना र प्रदर्शनलाई समेत अझ सशक्त बनाउँदै लैजाने बताइएको छ ।