- अर्थ सरोकार संम्वाददाता
काठमाडौँ – संविधान संशोधन विरुद्ध आन्दोलित भईरहेका नेकपा एमाले सहित नौ राजनीतिक दलले पुस २२ गते आयोजना हुने भनिएको बृहत जनप्रदर्शनलाई सफल बनाउन आफ्नो आफ्नो तर्फबाट तिव्र तयारी सुरु गरेका छन् ।
एमालेलगायत नौ दलले ‘पुस २२ गते १ बजे रत्नपार्क जाऔँ, संविधान कार्यान्वयनको पक्षमा राष्ट्रिय एकता प्रदर्शन गरौँ’ भन्ने नारासहित विशाल विरोध सभा गर्न लागेका छन् ।
यसैबीच,नेकपा एमाले, नेकपा माले, नेमकिपा, राष्ट्रिय जनमोर्चा, नेपाल परिवार दल, नेपाल जनमुक्ति पार्टी ९लोकतान्त्रिक०, नेपाः पार्टी, मधेस समता पार्टी र दलित जनजाति पार्टीका अध्यक्षहरुको हस्ताक्षर भएको अपिल घर–घरमा पुर्याउने कार्यक्रम पनि राखिएको छ ।
पुस २२ गते १ बजे रत्नपार्कबाट मूल जुलुश सुरु भई सहर परिक्रमा गरी ३ बजे भृकुटीमण्डपमा विरोध सभा हुने र सो सभालाई नौवटै पार्टीका अध्यक्षहरुले सम्बोधन गर्ने पनि जनाइएको छ ।
मोबाइलदेखि मोटरसाइकलसम्म
मालेले पुस २२ गतेको जनप्रदर्शनका लागि सडक तताउनेदेखि फेसबुक र भाइबरसम्मलाई प्रयोग गर्ने निर्णय गरेको छ । जसका लागि सबैले आफ्ना फेसवुक, पेज, ट्वीटरमा छोटा भाषा र आकर्षक ढंगले २२ गतेका सन्देश पोस्ट गर्ने, फेसवुक तथा भाइबरमा २२ गतेलाई केन्द्रित गरेर गु्रप बनाउने र प्रचार सन्देशमा कसैलाई अभद्र भाषा प्रयोग नगर्ने, सकारात्मक सन्देश मात्र प्रवाह गर्ने निर्णय पनि एमालेले गरेको छ । यसैगरी, पुस २० र २१ गते एसएमएस भाइरल चलाउने र प्रत्येक पार्टी सदस्यले कम्तीमा २० जनालाई एसएमएस पठाउने तयारी एमालेले गरेको छ ।
‘राष्ट्र र भावी पुस्ताका लागि पुस २२ गतेको विरोध प्रदर्शनमा सहभागी हुनेछु’ भन्ने प्रतिज्ञा पत्रमा घर–घरमा गएर अन्य ठाउँमा समेत हस्ताक्षर अभियान चलाउने, पुस २२ गते ३ घण्टाका लागि सबै सडकमा आउने, सिटी जुलुस, दौड जुलुस, प्रतिकात्मक प्रचार शैलीहरु अबलम्बन गर्ने, पुस २० र २१ गते भूगोलका जिल्ला कमिटीहरुले तीनै सहरमा माइकिङ गर्ने, २२ गतेलाई केन्द्रित गरी डिजिटल पोस्टर र पोस्टकार्ड तयार गरी प्रचार–प्रसार गर्ने, पुस २० गते ३ बजे रत्नपार्क शान्तिबाटिकाबाट राष्ट्रिय झण्डासहित प्रचार जुलुश गर्ने, पुस २२ गतेका लागि जिंगल बनाउने, मुख्य नेताहरुको भिडियो सन्देश बनाई २२ गते सभामा आउन अपिल सार्वजनिक गर्ने र आन्दोलनको आवश्यकता र औचित्यबारे अन्तर्राष्ट्रिय सञ्चारमाध्यमहरुलाई ब्रिफिङ गर्ने पनि एमाले केन्द्रीय प्रचार विभागले जनाएको छ ।
