काठमाण्डौ –  निर्माण कार्य सुरु भएको ९ वर्षपछि उदयपुरमा खानेपानी योजना सञ्चालनमा आएको छ। जिल्लाको दक्षिणी गाविस हडियामा ३ हजार घरधुरीलाई पानी पुग्ने योजना ९ वर्षपछि सम्पन्न भएर सञ्चालनमा आएको हो।  नेपाल सरकार र स्थानीयको जनश्रमदानबाट ३ करोड लागतमा २०६४ सालबाट निर्माण सुरु भएको हडिया खानेपानी तथा सरसफाइ उपभोक्ता समितिका अध्यक्ष कुमार बस्नेतले बताए। ‘निरन्तर काम गर्दा पनि ९ वर्ष भएछ’, अध्यक्ष बस्नेतले भने  ‘ढिलै भएपनि हडिया ५, ६ र ७ नम्बर वडाका ९५ घरधुरीले प्रत्यक्ष खानेपानी पाए।’

 मुहानबाट ल्याइएको खानेपानी वितरण गर्न १ लाख लिटर क्षमताको ओभरहेड ट्याङ्की निर्माण गरिएको छ। उनका अनुसार गाविसका मुहरीया, हात्तिसार, हडिया बजार, अँधेरी, शान्ति नगर, डाँडाटोल, मिल्स एरियामा पाइपलाइन वितरण गरिएको छ।  आयोजनाबाटै निकट भविष्यमा थप ५ सय घरधुरीलाई खानेपानीको सुविधा पुग्ने गरी काम भइरहेको समितिले जनाएको छ। 

गाविसका अधिकतर स्थानीयलाई स्वच्छ र शुद्ध खानेपानी उपलब्ध गराउने उदेश्यले थप ठाउँमा पाइपलाइन बिस्तार र ट्याङ्की निर्माणको काम भइरहेको बस्नेतले बताए।  खानेपानी आयोजना सञ्चालनमा आएपछि वर्षौंदेखि दुषित पानी खान बाध्य गाविसवासीलाई स्वच्छ खानेपानीको व्यवस्था भएको छ।