काठमाडौँ – माओवादी केन्द्रका पोलिटव्यूरो सदस्य एंव पूर्व सांसद कर्णजित बुढाथोकीले अध्यक्ष प्रचण्डलाई बुझाएको लिखित सुझावले माओवादीवृत्तमा तरंग पैदा गरेको छ ।

उनले प्रचण्डको यस्तै कार्यशैलीले जारी रहे पार्टी, आन्दोलन र मुलुक संकटमा पर्ने चेतावनी लिखित सुझावमा दिइएका छन्  । प्रचण्ड अहिले तत्काल काँग्रेससँग मिलेर क्षणीक फाइदा भएपनि दीर्घकालिन नहुने र यस्ले माओवादीलाई नै घाटा हुने पूर्व सांसद बुढाथोकीको ठहर छ ।

२० जिल्लामा चरम गुटवन्दी रहेको, ३५ जिल्लामा गुटवन्दी चलिरहेको तथा ११ जिल्लामा नयाँ शक्तिका कारण प्रत्यक्ष असर परेको बुढाथोकीको दाबी छ ।

केन्द्रीय सदस्यको संख्या ४ हजार पुग्नुलाई उनले चरम दिशाहिनताका रुपमा औँल्याइएको छ । पार्टी एकतालाई अवसरवादीहरुले भर्याङका रुपमा मात्र उपयोग गर्न खोजेको र पार्टीले गति लिन नसकेको भन्दै उनले असन्तुष्टि व्यक्त गरेका छन् ।

बुढाथोकीले दिएको उक्त सुझावमा प्रचण्डको नेतृत्वमाथि पनि घुमाउँरो शैलीमा प्रश्न उठाएका छन् । पाटीभित्रको गुटवन्दीको अवस्थालाई तथ्यसहित प्रस्तुत गर्दै उनले माओवादी यथास्थितिमा चुनाव भए नराम्रोसँग पराजित हुने विश्लेषण गरेका छन् ।

हालै प्रचण्डलाई बुझाइएको गोप्य लिखितमा जनयुद्धमा लडेका योद्धाहरु खाडीमा पसिना चुहाइरहेको तर अवसरवादीहरुले पार्टी कब्जा गर्न थालेको भन्दै बुढाथोकीले दुःख पोखेका छन ।