मेलम्ची – मेलम्ची खानेपानी आयोजनाको सुरुङस्थलमा भेटिएको सुन जस्तो पदार्थ सुननै भएको दाबी स्थानीयबासीहरुले गरेका छन् । उनीहरुले उक्त पदार्थ सुन नै भएको दावी गर्दै केहि गिरोह सुनजस्तै पदार्थ भन्ने हल्ला फिंजाएर भेटिएको सुनको दुरुपयोग गर्न खोजेको आरोप लगाएका छन् । ‘भेटिएको बस्तु सुन नै हो भनेर कुरा आएको थियो । पछी सुन भन्ने थाहा पाएपछि एक त सुरक्षा दिन सकिंदैन, अर्को आफु नै कमाउनु पर्छ भन्दै केहि गिरोह लागी परेका छन्। ‘ अर्थ सरोकार डटकमसँग कुराकानी गर्दै एक स्थानीयवासीले बताए ।    

पुन : परिक्षणका लागि लगियो :

स्थानीयबासीले आफूहरुलाई झुक्याएको भनेर विरोध गरेपछि स्थानीय समुदाय र राजनीतिक दलको रोहबरमा पुनःपरीक्षण गर्न पठाइएको मेलम्ची खानेपानी विकास समितिका कार्यकारी निर्देशक घनश्याम भट्टराईले जानकारी दिएका छन् । ‘स्थानीयबासीको विरोधपछी हामीले पुन: परिक्षणका लागि उक्त पदार्थ पठाएका छौं। ‘ उनले अर्थ सरोकार डटकमसँग भने ।