काठमाण्डौ – सन् २०१६ को विश्व समृद्धि सूचकांकका अनुसार भारतभन्दा नेपाल समृद्ध देखिएको छ । बेलायतको लेगाटम इन्स्टिच्युटले हालै सार्वजनिक गरेको लेगाटम समृद्धि सूचकमा समेटिएका विश्वका एक सय ४९ मुलुकमध्ये नेपाल ९४औँ स्थानमा छ ।

भारत नेपालभन्दा १० स्थान तल १०४औँ स्थानमा छ । सम्पत्ति र जनकल्याणसम्बन्धी विभिन्न आधारमा समृद्धि सूचक हरेक वर्ष प्रकाशित हुँदै आएको छ । नेपाल अघिल्लो वर्षको भन्दा पाँच स्थान तल झरेको हो ।

समृद्धि सूचकका अनुसार दक्षिण एसियामा नेपाल श्रीलंकापछिकै दोस्रो समृद्ध मुलुक हो । नेपालभन्दा माथि रहेको श्रीलंका ५६औँ स्थानमा छ । त्यस्तै, भारत १०४औँ, बंगलादेश ११४औँ, पाकिस्तान १३९औँ र अफगानिस्तान १४८औँ स्थानमा छन् ।

भुटान र माल्दिभ्सलाई यो सूचकमा समावेश गरिएको छैन । समृद्धि सूचकमा अर्थतन्त्र, शासन व्यवस्था, उद्यमशीलता एवं अवसरको प्राप्ति, शिक्षा, स्वास्थ्य, सुरक्षा, व्यक्तिगत स्वतन्त्रता, सामाजिक पुँजीजस्ता उपसूचक समावेश छन् ।आजको नयाँ पत्रिका दैनिकमा खबर छ ।