काठमाडौं–नेपालस्टक एक्सचेञ्ज (नेप्से) बैंकहरुलाई ब्रोकर लाइसेन्स दिने कुरामा सकारात्मक देखिएको छ ।
बैंकहरुलाई लाइसेन्स दिने विषय लामो समयदेखि चर्चामा छ ।
नेप्सेको निस्कृयताले यसमा खासै प्रगति हुन सकेको छैन । सयर लगानीकर्ता संघको टोलीसँग आइतबारको भेटमा नेप्सेका महाप्रबन्धक सीताराम थपलियाले आफू बैंकलाई लाइसेन्स दिन सकारात्मक रहेको बताएका हुन्। उनले ब्रोकर कम्पनीहरुको शाखा उपत्यकाबाहिर विस्तार गर्नसमेत नेप्से तयार भएको बताएका थिए ।
टोलीमा सहभागि एक लगानीकर्ताक अनुसार महाप्रबन्धक थपलियाले बैंकलाई ब्रोकर लाईसेन्स दिने कुरामा आफू गम्भिर रहेको बताएका थिए । नेप्सेले छिट्टै ब्रोकरको शाखा विस्तार गर्ने र बैंकलाई ब्रोकर लाईसेन्स दिने कुरामा आफू विश्वस्त भएको ती लगानीकर्ताले बताए।
धितोपत्र बजार विस्तार गर्न बाणिज्य बैंकलाई लाइसेन्स, ब्रोकरको शाखा उपत्यकाबाहिर विस्तार, क्लियरिङ बैंकको संख्या थप्नु पर्ने र अनलाइनबाटै कारोबार गर्नु पर्ने आवाज उठ्दै आएको छ । यसअघि नेप्सेले यी कुरामा सक्रियता देखाएको थिएन ।
अनलाईन ट्रेडिङ सञ्चालन ल्याउने विषयमा भने पुनरावेदन अदालतमा मुद्दा परेको छ । अदालतमा विचाराधिन मुद्दाको टुंगो लागेपछि मात्रै अगाडि बढ्ने नेप्सेका पदाधिकारीले बताएको ती लगानीकर्ताले जानकारी दिए।
