काठमाडौं –  विहीवार नेप्से परिसूचक २ दशमलव ६० प्रतिशतले बढेको छ । १ हजार ४ सय १३ विन्दुबाट खुलेको शेयर बजार उतार चढाव सँगै ३ घण्टाको व्यापारमा परिसूचक ३६ दशमलव ७८ अङ्कले बढेर १ हजार ४ सय ४९ दशमलव ९३ विन्दुमा पुगेको हो ।

 कारोबारमा आएका ‘अन्य’ समूह बाहेक सबै समूहको परिसूचक बढेपछि समग्र नेप्से परिसूचक उकालो लागेको हो । बीमा समूहको परिसूचक उच्च अङ्कले बढेको छ । यस व्यापार अवधिमा १ सय २२ कम्पनीको २ हजार ७ सय ८८ पटकको व्यापारमा रू ३७ करोड २३ लाख बराबरको शेयर कारोबार भएको छ ।

बीमा समूहको परिसूचक ६ दशमलव ३ प्रतिशतले बढेको छ । त्यस्तै, बैङ्किङ समूहको परिसूचक २ दशमलव ५८ प्रतिशत र जलविद्युतको २ दशमलव १६ प्रतिशतले बढेको छ । साथै, होटल समूहको परिसूचक १ दशलमव ९ प्रतिशत, वित्त कम्पनीको १ दशलमव ८७ प्रतिशत र विकास बैङकको १ दशलमव ४८ प्रतिशतले बढेको हो । ‘अन्य’ समूहको  भने शून्य दशमलव २ प्रतिशतले घटेको छ ।