काठमाडौँ  – पूर्व प्रधान मन्त्री तथा नेकपा एमालेका अध्यक्ष केपी शर्मा ओलीले पारिको विमान स्थल बनाउने काम सकाउन वारिको विमान स्थल बनाउन नदिएको कुरा खुलस्त पारेका छन् ।

सोमबार राति एमाले संसदीय दलको कार्यालयको सभाकक्ष सिंह दरबारमा एयरपोर्ट– फास्ट्रयाक निर्माण सङ्घर्ष समितिको ज्ञापन पत्र बुझने क्रममा ओलीले सो कुरा बताएका हुन् ।

उनले जसरी हुन्छ वारि नेपालको अन्तर्राष्ट्रिय विमानस्थल निर्माणको कार्यमा अलमल पार्ने र पारि भारतको बिहारमा बन्दै गरेको अन्तर्राष्ट्रिय विमान स्थल निर्माण कार्य सम्पन्न गर्ने भारतीय रणनीति अनुरूप यस्तो भइरहेको दाबी गरे ।

यसो हुँदा एकातिर फास्ट्रयाक निर्माणको कुरा टुङ्गिने र बारामा दोस्रो अन्तर्राष्ट्रिय विमान स्थल बन्ने सम्भावना टरेर जाने उनको भनाइ थियो । आफूले नेपालीको भावनालाई कहिल्यै आघात पुग्न नदिने भन्दै उनले समितिको दबाबमूलक कार्यक्रममा ऐक्यबद्धता रहेको भन्दै अभियानकर्मीले ल्याएको टोपी लगाएर अभियानकर्मीहरूमा उत्साहसमेत थपेका थिए ।

अध्यक्ष ओलीले फास्टङ्याकको निर्माण ठेक्का भारतलाई दिने निर्णयलाई आफ्नो नेतृत्वको सरकार हुँदा सच्चाएको र अब नेपालीहरूबाटै त्यसको निर्माण सुरु गर्न सरकारलाई दबाब दिने बताए । साथै नेपाली ४० लाखभन्दा बढी युवाहरू अरू मुलुकमा गएर अरूको देश बनाउन कसिरहँदा हाम्रो देशमा पूर्वाधारको कमी देखाएर अरूलाई राष्ट्रिय गौरवको आयोजना फास्ट्रयाक बनाउन दिनु घातक हुने बताए ।

“फास्ट्रयाक निर्माण गर्ने काम सुरु गर्न मेरै पालामा ९ अरब बजेट छुट्याइसकेको हो, प्रचण्डजीको नेतृत्वमा सरकार बनेको ४ महिना बितिसक्दा पनि काम सुरु किन भइरहेको छैन रु”, ओलीको प्रश्न थियो । भारतसँग ऋण लिएर १५ अरब अनुदान र बाँकी रकम ऋण लिएभन्दा कम ब्याजमा उल्टै ऋण दिएर फास्ट्रयाक बनाउन दिनुपर्छ अनि वार्षिक शुल्क पनि बुझाउनुपर्छ भन्ने भारतको मागकै कारण ठेक्का रद्ध गरिएको उनले स्पष्ट पारे ।

उखान र टुक्कामा माहिर नेता ओलीले स्याटालाइटबाट खिच्नेले खिचिसकेको, बाटो हेर्नुपर्नेले हेरिसकेको भन्दै अब सवारी साधनमा नै घर फर्कन अभियानकर्मीहरूलाई सल्लाहसमेत दिए ।

अभियानकर्मीहरूले आफूहरूको मागको उचित सम्बोधन नभए पुनः हिँडेरै जान तयार भएको भन्ने भनाइको जवाफमा उनले आफू प्रधानमन्त्री नभई प्रतिपक्षी दलको नेता भएको हुँदा संसदमा यसबारे खरो रूपमा प्रस्तुत हुने र ढुक्क भएर न्यानो तराई फर्कन अनुरोध गरे ।