काठमाण्डौ – पोखरा उद्योग वाणिज्य सङ्घद्वारा आयोजित राष्ट्रिय औद्योगिक व्यापार मेला सम्पन्न भएको छ । लगानीको संवद्र्धन उद्योग व्यवसायको प्रवद्र्धन नाराका साथ मङ्सिर २३ गतेबाट सञ्चालित मेलामा ११ करोड रुपैयाँ बराबरको कारोबार भएको सङ्घका महासचिव दामु अधिकारीले जानकारी दिए । ‘करीब १ लाख ५० हजार दर्शकले मेला अवलोकन गरे,’ उनले भने, ‘मेला अपेक्षाअनुुसार सफल भएको छ ।’

मेलामा अटो, सूचना प्रविधि, हस्तकला, कृषि, फलोरिकल्चर, दैनिक जीवनमा प्रयोग हुने सामग्रीसहितका २ सय ९५ स्टल राखिएका थिए । ‘सबै स्टलमा दर्शकको उत्साहजनक सहभागिता देखियो,’ अधिकारीले भने, ‘मेला व्यवसाय प्रवद्र्धन गर्ने महत्वपूर्ण माध्यम बनेको छ ।’

आगामी दिनमा सहभागीको चाहनालाई ध्यानमा राख्दै मेलालाई अझ परिमार्जन गरिने सङ्घका कार्यबाहक अध्यक्ष रवीन्द्रबहादुर प्रजूले बताए । ‘सबैको साथ र सहयोगबाट मेला सफल भएको हो,’ उनले भने, ‘सङ्घले सामाजिक उत्तरदायित्वपूर्ण व्यवसायलाई आफ्नो मूलमन्त्र बनाएको छ । उद्योगी व्यवसायीको समस्या समाधानमा सङ्घ निरन्तर लागिरहनेछ ।’

मेलामा रहेका स्टलमध्ये उद्योगतर्फ महाकाली वाइन प्रालि, व्यवसायतर्फ जुजु वयर्स, कृषि र पुष्प उत्पादनतर्फ सोन्सा एग्रो फर्म प्रालि, हस्तकलामा प्रगतिशील अल्लो समूह, अटोमा अटो भेञ्चर, रेष्टुराँमा वेलकम थकाली भान्छाघर तथा सङ्घरसंस्थातर्फ एनएमबी बैङ्क उत्कृष्ट घोषित भए । सङ्घका पूर्वअध्यक्ष राजेन्द्रकुमार लालचनको संयोजकत्वमा गठित मूल्याङ्कन समितिले ती स्टललाई उत्कृष्ट घोषणा गरेको हो ।