काठमाडौं – पुरानै गाउविकास समितिलाई आधार मानेर स्थानीय निकायको निर्वाचन गर्ने तयारी शिर्ष दलहरुले गरिरहेका बेला स्थानीय निकाय पुनसंरचना आयोगले आफ्नो प्रतिवेदन सरकारलाई बुझाउने तयारी गरेको छ ।

आयोगले ७६५ स्थानीय तहको निर्धारण गर्दै सरकारलाई प्रतिवेदन बुझाउने तयारी गरेको सदस्य सुनिलरंजन सिंहले बताए । ‘समय अवधि भन्दा दुई महिना अघि नै हामीले प्रारम्भीक काम सकेका छौ’ सिंहले भने ‘एक दुई दिनभित्रै मै प्रतिवेदन बुझाउँछौ ।’

आयोगले १५ सय पेज लामो प्रतिबेदन तयार पारेको छ । तयार पारेको प्रतिवेदन बुझाउन प्रधानमन्त्री पुष्पकमल दाहाल प्रचण्डसँग समय पनि माग सकेको छ । तर प्रधानमन्त्री कार्यालयले समय निर्धारण गरिनसकेको सिंहले बताए ।

भौगलिक, जनसंख्या र इलाकालाई आधार मानेर आयोगले स्थानीय तहको संरचना तयार पारेको छ । आयोगले प्रतिवेदन बुझाएपछि स्थानीय निकाय निर्वाचनको बाटो खुल्ने छ । तर दलहरु आयोगको भन्दा पुरानै संरचना अनुसार निर्वाचनमा जाने गरी सहमति गरिसकेका छन् ।

आयोगले सवै जिल्ला र तहमा छलफल गरि प्रतिवेदन तयार पारेको छ । तराईका केही जिल्लामा छलफल हुन नसकेपछि आयोग आफैले टुंग्याएको छ । टुंग्याइएका सवै क्षेत्रको सीमा र नामाकरण पनि गरिदिएको सिंहले बताए ।