कपिलवस्तु – उखुको मूल्य निर्धारण नभएको बहाना बनाउँदै जिल्लाको जवाभारीस्थित महालक्ष्मी सुगर्स मिलले उधारोमा उखु लिएपछि कृषक मारमा परेका छन् । मिलले भारतबाट आयातीत उखुलाई भने नगदै दिने गरेको कृषक बताउँछन् ।
मिल प्रशासनले आफूखुसी प्रतिक्विन्टल ४ सय ९२ रुपैयाँ मूल्य कायम गरी नेपाली कृषकसँग उखु किन्ने गरेको छ । भारतीय उखुलाइ भने प्रतिक्विन्टल ५ सय १२ रुपैयाँ नगदै दिने गरेको खबर आजको नागरिक दैनिकमा छ ।
उखु किसान संघ जिल्ला अध्यक्ष अनुप चौधरीले मिलले आफूखुसी मूल्य तोकेर स्वदेशी किसानसँग उधारेमा किनेकोप्रति रोष प्रकट गरे । उनले मिलले अझैसम्म किसानको २ बर्षको २ करोड रुपैयाँ नदिएको बताए ।
मिलले प्रत्येक दिन ७ हजार क्विन्टल भारतीय उखु आयात गर्ने जनाएको छ । मिलका क्यान अधिकृत हरिनारायण चौधरीले मूल्य कायम नभएको किसानलाइ तत्कालै भुक्तानी दिन असजिलो भएको बताए ।
