काठमाडौं  – आज १९ औं भूकम्प सुरक्षा दिवस देशभर विभिन्न कार्यक्रमका साथ मनाइँदै छ । भूकम्पबाट हुने क्षति कम गर्न जनचेतनामूक कार्यक्रम गरी सरकारले आज काठमाडौंको साँखुमा एक विशेष कार्यक्रमको आयोजना गरेको छ ।

२०७२ साल वैसाख १२ गतेको विनाशकारी भूकम्पबाट धेरै जनधनको क्षति भएको काठमाडौंको साँखुमा ‘भूकम्पीय सुरक्षाको बलियो आधार, भैँचालो थेग्ने घर र भौतिक पूर्वाधार’ भन्ने नाराका साथ भूकम्प सुरक्षा दिवस मनाईंदै छ ।

आज विहान ११ बजेर ५५ मिनेटमा सरकारी प्रतिनिधिहरुको सहभागिता जनचेतनामूलक कार्यक्रमसँगै भूकम्पप्रतिरोधी सामग्रीको प्रदर्शनी गरिने छ । प्रदर्शनी पाँच दिनसम्म चल्ने बताइएको छ ।

१९९० सालको विनाशकारी भूकम्पले ठूलो मात्रामा जनधनको क्षति गरेको स्मृतिसँगै भूकम्प प्रतिरोधी संरचना निर्माण गरी भूकम्पबाट हुने क्षति कम गर्न यो दिवस मनाईँदै आएको छ । २०५६ सालदेखि माघ २ गतेलाई सरकारी स्तरबाटै भूकम्प सुरक्षा दिवसका रुपमा मनाउने गरिएको छ ।

यद्यपि २०५६ सालदेखि निरन्तर भूकम्प सुरक्षा दिवस मनाउन थालिएको भए पनि त्यसले कुनै उपलव्धी हाँसिल गरेको छैन । २०७२ साल वैशाख १२ गतेको विनाशकारी भूकम्पमा यस अघि सुरु गरिएका घुँडा टेकि गुडुल्कि जस्ता प्राविधिक उपायले क्षतिलाई रोक्न सकेनन् ।

 सरकारले ध्वंश संरचनाको पुनर्निमाणमा तदारुकता देखाएको छैन । पालमुनि वसेका मानिसहरुलाई वैकल्पिक व्यवस्था अझै हुन सकेको छैन ।

वर्सेनि मनाइने भूकम्प सुरक्षा दिवस औपचारिकतामा मात्रै सीमित भएको छ ।