काठमाडौं – अख्तियार दुरुपयोग अनुसन्धान आयोगका निलम्बित प्रमुख आयुक्त लोकमानसिंह कार्की विरुद्धको मुद्दामा सर्वोच्च अदालतमा बिहीबार सुनुवाइ हुने भएको छ । पुस ७ गतेदेखि सुरु भएको सुनुवाई दुई दिन भएपछि १२ दिनका लागि स्थगित भएको थियो। 

बिहीबार कार्की पक्षका वकिलहरुले बहस गर्नेछन् । न्यायाधीशहरु ईश्वरप्रसाद खतिवडा, डा आनन्दमोहन भट्टराई र अनिलकुमार सिन्हाको पूर्ण इजलासमा सुनुवाई भइरहेको हो । कार्की र सरकारको तर्फबाट बहस सकिएपछि रिट निवेदक अधिवक्ता ओमप्रकाश अर्यालको पक्षबाट जवाफी बहस सुरु हुनेछ । 

कार्कीको नियुक्ति संविधान विपरीत भएको जिकिर गर्दै अधिवक्ता अर्यालले दिएको रिट निवेदन खारेज भइसकेपनि त्यसलाई पुनरवलोकन गर्ने निर्णय सर्वोच्च अदालतले गरेको थियो । दुवै पक्षको बहस सकिएपछि सर्वोच्चले कार्कीको नियुक्ति संविधान सम्मत भए नभएको बारे निर्णय दिनेछ ।