काठमाडौं – माछापुच्छ्रे बैंकको ५० प्रतिशत हकप्रद सेयर भर्ने आज अन्तिम दिन हो । आइतबार बैंकिङ समयपश्चात सेयर आवेदन लिने कार्य बन्द हुने माछाले जानकारी दिएको छ । यो हकप्रद सेयरमा कात्तिक ११ गतेसम्म कायम सेयरधनीले आवेदन दिन सक्छन् । बैंकले एक सय रूपैयाँ अंकित मूल्यको एक करोड ९३ लाख २२ हजार ७०० सय कित्ता हकप्रद सेयर बिक्री खुला गरेको हो । 

यसमा बिक्री प्रबन्धकको काम सिभिल क्यापिटल लिमिटेडले गरेको छ । यसअघि बैंकले आवश्यकता अनुसार सेयर आवेदन नपरेपछि एक साताको समय थप गरेको थियो । त्यो समय आइतबार सकिन लागेको हो । 

माछाको हाल चुक्ता पुँजी चार अर्ब ६६ करोड ६४ लाख ३० हजार रूपैयाँ रहेको छ । बैंकको रिजर्भ कोषमा ९२ करोड रूपैयाँभन्दा धेरै पैसा छ । बैंकले चालु आर्थिक वर्षको प्रथम त्रैमासमा २४ करोड ६९ लाख ५१ हजार रूपैयाँ खुद नाफा कमाएको छ । 

यो बैंकको प्रतिसेयर आम्दानी २१ रूपैयाँ १७ पैसा र प्रतिसेयर नेटवर्थ ११९ रूपैयाँ ७३ पैसा छ । बैंकले गत वर्षको नाफाबाट असार मसान्तसम्म कायम चुक्ता पुँजीको आधारमा २०।७५ प्रतिशत बोनस सेयर पनि दिएको छ ।