काठमाडौं  – गत साता शेयर बजार ओरालो लागेको थियो । पहिलो दिनदेखि नै घटेको नेप्से परिसूचक अन्तिम दिन भने न्यून प्रतिशतले बढेर बन्द भएको थियो । परिसूचक घटेपनि कारोबार रकम भने न्यून प्रतिशतले सुधारिएको थियो ।

 गत साता होटल समूह, विकास बैङ्क र व्यापार समूह बाहेक बाँकी सबै समूहको परिसूचक घटेको थियो । सातामा परिसूचक १७ दशमलव ३० अङ्कले घटेको थियो । अघिल्लो साताको अन्तिम दिन १ हजार ४ सय ७९ दशमलव ८६ विन्दुमा बन्द भएको नेप्से परिसूचक गत साताको अन्तिम व्यापार दिन बढेर १ हजार ४ सय ६२ दशमलव ५६ विन्दुमा पुगेको थियो ।

 अघिल्लो साताको अन्तिम दिनको तुलनामा गत साताको अन्तिम व्यापार दिनमा कारोबार रकम भने रू. १ करोड ६७ लाखले बढेको हो । गत साताको पहिलो व्यापार दिनको तुलनामा अन्तिम दिन भने परिसूचक १५ दशमलव १६ प्रतिशतले घटको थियो ।

सातामा १४ हजार ७ सय ८५ कारोबारबाट १ सय ५३ कम्पनीहरुको १ करोड १३ लाख १८ हजार २ सय ७० कित्ता शेयरहरु खरीद बिक्री भए । जसबाट रू. १ अर्ब ८५ करोड ९० लाख ३७ हजार बराबरको रकम परिचालित भयो । यो रकम अघिल्लो साताको तुलनामा ६ दशमलव ९६ प्रतिशत बढी हो । अघिल्लो साता १ सय ४८ कम्पनीको १३ हजार १ सय ४० कारोबारबाट १ करोड ३३ हजार ७ सय ८० कित्ता शेयर किनबेच भएको थियो । यसबाट रू. १ अर्ब ७३ करोड ७९ लाख ९९ हजार बराबरको रकम कारोबार भएको थियो ।

होटल समूहको परिसूचक ७ दशमलव ८७ अङ्क, बीमा बैङ्कको ३ दशमलव ३४ अङ्क र व्यापारको १ दशमलव १३ अङ्क बढेको छ । त्यसैगरी, बीमा समूहको परिसूचक ३३ दशमलव ८५ अङ्क बढेको थियो । साथै, बैङ्किङ समूहको परिसूचक २२ दशमलव ६२ अङ्क, वित्त कम्पनीको ३ अङ्क, जलविद्युतको ७ दशमलव ८६ अङ्क, उत्पादन तथा प्रशोधनको २५ दशमलव ९६ अङ्क र ‘अन्य’ समूहको १ दशमलव १३ अङ्क घटेको हो ।  

गत साता ‘क’ वर्गका कम्पनीहरुको कारोबार मापन गर्ने सेन्सेटिभ इन्डेक्स पहिलो दिनको तुलनामा २ दशमलव ७३ अङ्कले घटेर ३ सय १७ दशमलव ३२ अङ्कमा पुगेको हो । त्यसैगरी, फ्लोट इन्डेक्स पहिलो व्यापार दिनको तुलनामा अन्तिम दिन १ दशमलव २ अङ्कले घटेर १ सय ८ दशमलव ५४ अङ्कमा पुगेको हो ।

सो साता कारोबार रकमका आधारमा प्रभु बैङ्क अग्रस्थानमा रहेको छ । यस वाणिज्य बैङ्कले गत साता रू. २० करोड ९३ लाख बराबरको शेयर कारोबार गरेको थियो । कारोबार सङ्ख्याको आधारमा पनि प्रभु बैङ्क नै अग्रस्थानमा रहेको थियो । यस वाणिज्य बैङ्कले १ हजार ५ सय पटक कारोबार गरेको थियो । गत साता पनि कारोबार भएको शेयर सङ्ख्याको आधारमा नबिल व्यालेन्स फण्ड १ नै अग्रस्थानमा रहेको थियो ।