काठमाण्डौ – कमोडिटिज बजारमा कच्चा तेलको भाउ घटेकोे छ । हालै सार्वजनिक भएका तथ्याङ्कहरूले अमेरिकामा तेल उत्खनन तीव्र दरमा बढिरहेको देखिएपछि तेलको भाउ घट्ने क्रमले थप निरन्तरता पाएको हो । यस तथ्याङ्कले बजारलाई टेवा दिन उत्पादन कटौती गर्ने ओपेक तथा अन्य तेल उत्पादक राष्ट्रहरूको प्रयास कतै व्यर्थ हुने त होइन भन्ने चिन्ता लगानीकर्तामा बढाएको छ । 

शुक्रवार बजार बन्द हुँदा न्यूयोर्क मर्कण्टाइल एक्सचेञ्जको कोमेक्स डिभिजनमा मार्च डेलिभरीको यूएस् क्रुड आयलको भाउ ६१ सेण्टले घटी प्रतिब्यारेल ५३ डलर १७ सेण्ट कायम भएको थियो । उता लण्डनस्थित आईसीआई फ्युचर्समा अन्तरराष्ट्रिय बेञ्चमार्क ब्रेण्ट क्रुडको भाउ पनि प्रतिब्यारेल ७२ सेण्टको कमीसहित ५५ डलर ५२ सेण्टमा आएको थियो ।

बेकर ह्यूजले सार्वजनिक गरेको तथ्याङ्कअनुसार गतहप्ता अमेरिकी तेल तथा ग्यासमा थप १५ रिग थपिएको छ । योसँगै  विगत १३ हप्तामा १२ हप्ता रिग काउण्ट बढेको छ । योसँगै अमेरिकाको कुल रिग काउण्ट ५ सय ६६ मा पुगेको छ । यो सन् २०१५ को नोभेम्बरयताकै उच्च हो ।

तत्काल तेल बजारमा आपूर्ति सबैभन्दा मुख्य तत्त्व बनेको छ, ओपेकले घटाएको आपूर्तिलाई अमेरिकाले पूर्ति गरिरहेको छ,’ अमेरिकी बैङ्क ‘प्राइभेट क्लाइण्ट ग्रूप’का क्षेत्रीय लगानी व्यवस्थापक मार्क वट्किन्सले भने । चीन र सिङ्गापुरलगायतका मुख्य बजारमा नयाँ वर्षको सार्वजनिक बिदाका कारण छिटपुट कारोबार हुँदा एशियाली बजारमा भने तेलको भाउ बढेको छ ।